Ikki haftalik tanaffusdan so‘ng bugun yana Superliga bahslari boshlanadi.

«Lokomotiv» o‘z maydonida Olmaliq shahrining AGMK jamoasini qabul qiladi. Turnir jadvalida «Lokomotiv» 28 ochko bilan 9-o‘rinni egallab turibdi. AGMK hisobida esa 42 ochko mavjud bo‘lib, bu jamoa 3-o‘rinda boryapti.

Bugungi o‘yin «Loko» uchun qatorasiga uchta safar uchrashuvidan so‘ng o‘z maydonidagi ilk bahs bo‘ladi. «Temiryo‘lchilar» bungacha Navoiy Termiz va Muborakda to‘p tepib, har uchala o‘yinda durang qayd etishdi.

Umuman ikkinchi davra boshlanganidan beri «Loko» 4 marta g‘alaba qozonib, 4ta bellashuvda durang o‘ynadi va bir bor mag‘lub bo‘ldi. Jamoa bungacha o‘z maydonidagi har ikki bahsni g‘alaba bilan yakunladi: «Navbahor» va «Bunyodkor» mag‘lub etildi.

Ikkinchi davrani mag‘lubiyat bilan boshlagan AGMK bitta o‘yinda durang qayd etib, qatorasiga 4ta bellashuvda zafar quchdi. Biroq oxirgi uch turda faqat mag‘lubiyatga uchradi. AGMK «Nasaf»ga 0:2, «Qo‘qon-1912»ga 0:1 va «Paxtakor»ga 0:6 hisobida imkoniyatni boy berdi.

AGMK ikkinchi davra start olganidan so‘ng 6ta uchrashuvni safarda o‘tkazdi: bunda 3 g‘alaba va 3 mag‘lubiyat qayd etildi.