Икки ҳафталик танаффусдан сўнг бугун яна Суперлига баҳслари бошланади.

«Локомотив» ўз майдонида Олмалиқ шаҳрининг АГМК жамоасини қабул қилади. Турнир жадвалида «Локомотив» 28 очко билан 9-ўринни эгаллаб турибди. АГМК ҳисобида эса 42 очко мавжуд бўлиб, бу жамоа 3-ўринда боряпти.

Бугунги ўйин «Локо» учун қаторасига учта сафар учрашувидан сўнг ўз майдонидаги илк баҳс бўлади. «Темирйўлчилар» бунгача Навоий Термиз ва Муборакда тўп тепиб, ҳар учала ўйинда дуранг қайд этишди.

Умуман иккинчи давра бошланганидан бери «Локо» 4 марта ғалаба қозониб, 4та беллашувда дуранг ўйнади ва бир бор мағлуб бўлди. Жамоа бунгача ўз майдонидаги ҳар икки баҳсни ғалаба билан якунлади: «Навбаҳор» ва «Бунёдкор» мағлуб этилди.

Иккинчи даврани мағлубият билан бошлаган АГМК битта ўйинда дуранг қайд этиб, қаторасига 4та беллашувда зафар қучди. Бироқ охирги уч турда фақат мағлубиятга учради. АГМК «Насаф»га 0:2, «Қўқон-1912»га 0:1 ва «Пахтакор»га 0:6 ҳисобида имкониятни бой берди.

АГМК иккинчи давра старт олганидан сўнг 6та учрашувни сафарда ўтказди: бунда 3 ғалаба ва 3 мағлубият қайд этилди.