“Andijon” – “Mash’al” jamoalari o‘rtasidagi uchrashuvdan keyin odatga ko‘ra bosh murabbiylar ishtirokida matbuot anjumani o‘tkazildi. Mezbonlar ustozi Otabek G‘ulomxo‘jayev uchrashuv taassurotlari haqida quyidagilarni aytdi:

— Bu uchrashuvga tayyorgarlik ko‘rishimiz uchun 14 kun vaqtimiz bor edi. Birinchi maqsadimiz futbolchilarning jismoniy tayyorgarligini yaxshilab olish edi. To‘g‘risi, biz biroz boshqacha o‘yinga hozirlik ko‘rgandik. Ko‘rdinglar, kechadan boshlab yomg‘ir va qor yog‘di. Maksimal darajada o‘yinga tuzgan rejamizni amalga oshirishga harakat qildik. Bunday havoda va maydonda to‘p surish qiyin. Biz nafaqat futbol bilan, balki maydon bilan ham kurashdik.

— O‘yin xuddi durangga qarab ketayotgandek edi. Qolaversa, bu sizning Superligadagi debyutingiz edi. Uchrashuv oxirlarida gol urilishiga qanday reaksiya bildirdingiz?

— Ha, buni inobatga olish kerak. Mening Superligadagi debyutim muvaffaqiyatli chiqdi. Baribir o‘yin oxirlarida ham xotirjamlik bor edi. Tayyorgarlik borasida ham yigitlar bilan hammasini gaplashib olgandik. Ularning menga, mening esa ularga bo‘lgan ishonchimiz uyg‘ongandi. Ketma-ket mag‘lubiyatlar sababli turnir jadvalida qanday ahvoldaligimizni ko‘rib turibsizlar. Qahramon Bahodirov bilan uchrashuvdan avval gaplashganimda 30 daqiqagacha tayyor bo‘laman deb aytgandi. Meliyev ikkalasi maydonga tushgach, hujumlarimimiz yanada kuchaydi. Murabbiy sifatida buni his qilgandim.

— Bahodirov hujumchi bo‘lmasa-da, zaxiradan maydonga tushgach, faqat oldingi chiziqda to‘p surdi...

— O‘zi ham “Mash’al”da to‘p surgan. U raqib himoyachilarini ham yaxshi bilardi. Meliyev bilan Bahodirov o‘yinga qo‘shilgach, taktik rejalarni ham o‘zgartirdik.