Namanganning "Navbahor" klubi sobiq bosh murabbiyi va Angliyaning «Manchester Yunayted» klubi sobiq futbolchisi Andrey Kanchelskis jamoa bosh murabbiyi ser Aleks Fergyusonni ingliz tilini tushunmaganligi sababli, tasodifan so‘kib yuborganini esladi.
«Chet ellik futbolchilarga doim so‘kish o‘rgatiladi. Buni Rossiyada murabbiylik qilganimda braziliyalik futbolchilar misolida ko‘rganman.
Menga «Manchester Yunayted»da murabbiyga qanday murojaat qilishni o‘rgatishgan. Birinchi marta Fergyuson bilan "Manchester Yunayted" bazasi yo‘lakchasidan kesib o‘tganimizda, u menga: "Xo‘sh, Andrey, yaxshimisan?" - dedi. Men kuldim-da, unga javob qaytardim: «Yo‘qol, shotlandiyalik ahmoq».
Fergyuson avvaliga dong qotib turdi, men hayron bo‘lib turgandim, u yo‘lakchadan aks-sado berayotgan kulguni eshitganidan so‘ng, kula boshlagandi», – deb o‘sha voqeani xotirladi Kanchelskis o‘zining tarjimai holida.
