Coca Cola Superliga 24-turdan o‘rin olgan "Qizilqum" — "Metallurg" (1:0) uchrashuvidan so‘ng mehmonlar bosh murabbiyi Andrey Shipilov fikrlarini bildirib o‘tdi.

— O‘yin yaxshi taassurot qoldirdi. Vaziyatlardan foydalanishda bu safar ham oqsoqlandik. O‘yinni borishini, to‘pni nazorat qildik. Keyingi o‘yinga tayyorlanishda davom etamiz.

— Aleksandr Lobanovning bugun zaxirada qoldirilishiga sabab nima? "Bunyodkor" bilan o‘yinni yaxshi o‘tkaza olmagani uchun bugun maydonga tushmadimi?
— Uning o‘yinidan qoniqyapmiz. Bizda rotasiya ketmoqda. Qo‘l ostimizdagi boshqa futbolchilarni ham tekshirib olishni istadik. Aleksandr Lobanov hozirda chempionatimizning eng yaxshi darvozabonlaridan biri. Buni ko‘pchilik ko‘rmaydimi, munosib baholashmaydi. Akmal Tursunboyev yaxshi maktab ko‘rgan. Bugun unga imkoniyat berdik. O‘zini ko‘rsata oldi, ishonchimizni oqladi. Yaxshi shakllangan jamoada bir nafar kiper bo‘lmasligi kerak. Kamida uchta darvozabon bo‘lishi lozim. Yoshlar terma jamoamizga nomzod Vladimir Vagin jarohat olgan. Hozirda tiklanish jarayonini o‘tkazmoqda. Mavsum oxiri, barchaga o‘yin amaliyoti beramiz.

— Bugun tarkibingizda kimlarni ajratib ko‘rsatgan bo‘lardingiz?
— Barcha 11 nafar futbolchimiz yaxshi harakat qildi. Hech kimga e’tirozim yo‘q. Gohida jamoa munosib o‘yin ko‘rsatadi, lekin natija o‘xshamaydi. Ayrim payt esa aksi kuzatiladi. Penalti borasida tanaffusda tasvirlarni ko‘rsatishdi. Penalti yo‘q edi. Yana ko‘rib chiqamiz. Ammo buni muhokama qilmoqchi emasman. Unga baho beradigan mas’ul kishilar, tashkilotlar bor.