Ispaniya chempionatining 12-turidan o‘rin olgan markaziy o‘yin "Ramon Sanches Pisxuan" stadionida bo‘lib o‘tdi. "Sevilya" va "Real" jamoalari o‘rtasidagi o‘yin madridliklarning kichik hisobdagi g‘alabasi bilan yakunlandi.

Yo‘qotadigan narsasi qolmagan Zidan shogirdlari o‘yin boshidan raqib darvozasi tomon bosim uyushtirdi. Andalusiyaliklar esa tartibli o‘yin evaziga tanaffusga qadar darvoza daxlsizligini saqlab qolishdi.

Ikkinchi bo‘limda Lopetegi shogirdlari o‘z o‘yinlarini kuchaytirishdi. Ammo bahsning 55-daqiqasida madridliklar tezkor hujum tashkil qilishdi. Benzemaning ajoyib uzatmasidan keyin Mendi chap qanotdan oldinga o‘tdi va jarima maydoniga uzatma berdi. To‘pga tashlangan Vinisiusning oyog‘i to‘pga biroz tegdi. Darvozabon Yassin Bunu noto‘g‘ri joy tanlagani to‘p unga tegib, darvozaga kirib ketdi.

Shundan so‘ng "Sevilya" bir nechta o‘zgarishlarni amalga oshirish orqali jamoaga hujumkorlikni qaytardi. Susoning kuchli zarbasiga biroz aniqlik yetishmagan bo‘lsa, Okampos tomonidan yo‘llangan chalqancha uslubdagi zarbani Kurtua qaytarishga muvaffaq bo‘ldi.

Shu tariqa, "Real" qiyin o‘yinda muhim 3 ochkoni qo‘lga kiritdi hamda o‘z ochkolarini 20taga yetkazib, 3-o‘ringa ko‘tarilib oldi.

Ispaniya La ligasi, 12-tur
Sevilya – Real Madrid 0:1 (0:0)
Gol: 0:1 – 55, avtogol Bunu.
Sevilya – Bunu, Navas, Kunde, Diyego Karlos (Idrissi, 80), Rakitich (En-Nesiri, 64), Aleish Vidal, Fernando, Jordan (Gudel, 64), Okampos, de Yong (Suso, 64), Munir (Oliver Torres, 46).
Real Madrid – Kurtua, Varan, Nacho, Mendi, Vaskes, Modrich, Kroos, Rodrigo (Asensio, 66), Kazemiro, Vinisius Junior, Benzema.
Ogohlantirishlar: Kroos (44), Modrich (60), Gudel (76), Vinisius Junior (89).