Испания чемпионатининг 12-туридан ўрин олган марказий ўйин "Рамон Санчес Писхуан" стадионида бўлиб ўтди. "Севилья" ва "Реал" жамоалари ўртасидаги ўйин мадридликларнинг кичик ҳисобдаги ғалабаси билан якунланди.

Йўқотадиган нарсаси қолмаган Зидан шогирдлари ўйин бошидан рақиб дарвозаси томон босим уюштирди. Андалусияликлар эса тартибли ўйин эвазига танаффусга қадар дарвоза дахлсизлигини сақлаб қолишди.

Иккинчи бўлимда Лопетеги шогирдлари ўз ўйинларини кучайтиришди. Аммо баҳснинг 55-дақиқасида мадридликлар тезкор ҳужум ташкил қилишди. Бенземанинг ажойиб узатмасидан кейин Менди чап қанотдан олдинга ўтди ва жарима майдонига узатма берди. Тўпга ташланган Винисиуснинг оёғи тўпга бироз тегди. Дарвозабон Яссин Буну нотўғри жой танлагани тўп унга тегиб, дарвозага кириб кетди.

Шундан сўнг "Севилья" бир нечта ўзгаришларни амалга ошириш орқали жамоага ҳужумкорликни қайтарди. Сусонинг кучли зарбасига бироз аниқлик етишмаган бўлса, Окампос томонидан йўлланган чалқанча услубдаги зарбани Куртуа қайтаришга муваффақ бўлди.

Шу тариқа, "Реал" қийин ўйинда муҳим 3 очкони қўлга киритди ҳамда ўз очколарини 20тага етказиб, 3-ўринга кўтарилиб олди.

Испания Ла лигаси, 12-тур
Севилья – Реал Мадрид 0:1 (0:0)
Гол: 0:1 – 55, автогол Буну.
Севилья – Буну, Навас, Кунде, Диего Карлос (Идрисси, 80), Ракитич (Эн-Несири, 64), Алеиш Видаль, Фернандо, Жордан (Гудель, 64), Окампос, де Йонг (Сусо, 64), Мунир (Оливер Торрес, 46).
Реал Мадрид – Куртуа, Варан, Начо, Менди, Васкес, Модрич, Кроос, Родриго (Асенсио, 66), Каземиро, Винисиус Жуниор, Бензема.
Огоҳлантиришлар: Кроос (44), Модрич (60), Гудель (76), Винисиус Жуниор (89).