UEFA 2024 yildan boshlab Chempionlar ligasi formatiga o‘zgartirish kiritmoqchi. Rejaga ko‘ra, musobaqaning guruh bosqichidagi ishtirokchilar soni 36ta jamoaga yetkaziladi.

UEFA yangi formatni Yevropa klublar assosiasiyasi bilan birgalikda ishlab chiqmoqda. Bunda birinchi navbatda Yevropaning top-klublari manfaatlari inobatga olinmoqda. Bu orqali tashkilot yuzaga kelishi mumkin bo‘lgan Yevropa superligasi musobaqasining oldini olmoqchi.

"The Sun" tarqatgan xabarga ko‘ra, Angliya, Germaniya, Ispaniya va Italiyaning 4tadan klublari to‘g‘ridan-to‘g‘ri guruh bosqichida ishtirok etadi. Reytingda quyi o‘rinlarni egallagan mamlakatlarga esa 2-3tadan o‘rin ajratiladi. Shuningdek, saralash bosqichi orqali guruh bosqichi uchun yo‘llanmalar o‘ynaladi.

Shuningdek, guruh bosqichi uchun 2ta «wild card» yo‘llanmasi ajratiladi. Ushbu yo‘llanma o‘z milliy chempionati orqali YECHL yo‘llanmasiga ega bo‘lmagan, ammo UYEFA reytingida yuqori pog‘onalarni egallab turgan top-klublarga beriladi.

Manbaga ko‘ra, ushbu yangi qoida Angliya klublarining YECHLdagi ishtirokchilari sonini 6tagacha oshirishga yordam berishi mumkin. Masalan, joriy mavsumda ushbu 2ta o‘ringa "Arsenal" va "Roma" ega chiqqan bo‘lardi.