O‘zbekiston chempionati hamda kubok doirasida 2008 yildan buyon davom etayotgan qarama-qarshilik: AGMK - "Nasaf" to‘qnashuvida 31-bellashuv.

Hozirga qadar o‘tkazilgan 30 uchrashuvda jamoamiz 6 g‘alaba, 10 durang va 14 mag‘lubiyat qayd etgan. Bu borada ustunlik raqib — "Nasaf" tarafida. To‘plar nisbati ham qarshiliklar foydasida: 27-45.

"Nasaf" joriy mavsum Superligada kumush medallariga ega chiqdi, AGMK esa o‘z tarixida ilk bor bronza medalini qo‘lga kiritdi. Chempionatda ham yonma-yon ketgan va mavsum davomida o‘zaro raqobatga kirishgan bu ikki jamoalar endilikda mamlakat kubogi finali yo‘lida Olmaliqda to‘qnashmoqda.

Chempionat sovrindorlari mavsumni kubok bilan tugatishni niyat qilgan. AGMK O‘zbekiston kubogi doirasida hali "Nasaf"ga mag‘lub bo‘lmagan. Lekin qarshiliklar bir marta AGMKni kubok musobaqasidan chiqarib yuborishgandi.

Jamoalar dastlab 2009 yilgi kubokda to‘qnash kelishgan va o‘shanda asosiy vaqtda g‘olib aniqlanmagach penaltilar seriyasida (6:7) omad "Nasaf"ga kulib boqqan.

AGMK O‘zbekiston kubogini qo‘lga kiritgan 2018 yili nimchorak finalda "Nasaf"ni dog‘da qoldirib, chorak finalga yo‘llanma olgan va keyinchalik O‘zbekiston kubogi sohibiga aylangandi.

AGMK va "Nasaf" jamoalarining O‘zbekiston kubogi doirasidagi o‘yinlari:

2009 yil
O‘zbekiston kubogi, 1/8 final.
AGMK - "Nasaf" 1:1 (pen: 6:7)

2018 yil
O‘zbekiston kubogi, 1/8 final.
AGMK - "Nasaf" 2:1
Gollar: Otabek Zokirov (28), Yovan Jokich (30) - Saydullo Rahmatov (74)

Ertangi bahs AGMK va "Nasaf" jamoalarining O‘zbekiston kubogidagi uchinchi to‘qnashuviga aylanadi. AGMK joriy mavsum O‘zbekiston kubogida dastlab "Lokomotiv"ni (3:0), keyinchalik "Metallurg"ni (4:3) musobaqadan chiqarib yubordi. "Nasaf" esa vodiy jamoalari "Andijon" (1:0) va "Navbahor" (2:1) ustidan g‘alaba qozondi.

Mirjalol Qosimov boshchiligidagi AGMK jamoamiz ertangi yarim final bellashuviga jiddiy hozirlik ko‘rdi. Barcha olmaliqlik AGMK jamoasi muxlislarini ertaga soat 16:00da OKMK sport majmuasida boshlanajak muhim va qiziqarli o‘yinga taklif etamiz!

AGMK Siz aziz futbol ishqibozlarini xursand etish uchun maydonga saf tortadi va qatorasiga uchinchi marotaba final yo‘llanmasiga egalik qilish uchun kurashadi.

Maqsad va manzil aniq! Olg‘a, AGMK!

O‘zbekiston Kubogi, yarim final.

16 dekabr, chorshanba

AGMK — «Nasaf» (16:00)

Hakamlar: Akobirxo‘ja Shukurullayev, Aleksandr Sidorov, Baxtiyorxo‘ja Shavkatov, Abdurashid Xudoyberganov

Nazoratchi: Oleg Dachev

Komissar: Alisher Fayziyev