Futzal masalasida
Yangi yilning ilk ish kunida futzal murabbiylari bilan uchrashdik. Xabaringiz bor, futzalda bu mavsum may oyi yakuniga qadar davom etadi. Albatta bunda kubok uchrashuvlari ham hisobga olingan. 2021/22 yilgi mavsum esa sentyabrdan e’tiboran start oladi. Yozni futzal uchun transfer oynasiga hamda sohil futbolga bag‘ishlashga harakat qilamiz. O‘zPFL futzal bo‘yicha nimalarni maqsad qilgan?
Futzal uchrashuvlarini to‘liq jonli efirga olib chiqish.
Biz bu borada Sport-TV bilan oldinga yura oldik va so‘nggi 4 oyda bir qator turlarni jonli ko‘rsata oldik. Jonli efirlar bilan futzal ommabopligi oshadi, jonli efirlar futzalchilarga motivasiya beradi, chunki ularni oila-a’zolari, muxlislari tomosha qiladi. Jonli efirlar bilan futzal uchun titul homiylar topish osonroq bo‘ladi.
Futzal klublarining bir joyga jamlanib o‘yinlar o‘tkazishi ham TV ishini osonlashtiradi, ham mutaxassislarga o‘zaro fikr almashish va futzalchilarni o‘rganish uchun keng imkoniyat yaratadi.
Futzal geografiyasini kengaytirish.
Biz hozir Toshkent, Olmaliq va Jizzax bilangina cheklanyapmiz. Bu ro‘yxatga 1 yil ichida kamida Xorazm, Samarqand, Qarshi, Navoiy, Farg‘ona va Namanganni qo‘shish harakatidamiz. Futzal ommabopligi oshishi uchun uni faqatgina ma’lum nuqtadagina o‘ynash kifoya qilmaydi. Qamrovni kengaytirish muhim. Misol uchun, Farg‘onadagi Samo arenasida futzal chempionatlarini o‘tkazish masalasida viloyat hokimi Xayrulla Bozorov va sport vaziri Dilmurod Nabiyev bilan fikr almashdik. Umid qilamanki, shu yil bu ishga ulgura olamiz.
Yana bir muhim jihat bor. Aytaylik, biz Bunyodkor futzal zalidan ko‘p foydalanamiz va bu uchun klubga rahmat aytamiz. Ammo bu arena mashg‘ulot uchun qulay. Unda na muxlislar va translyasiya masalasi inobatga olingan. Istiqbolda esa futzal Toshkentdagi O‘zbekiston yoki Farg‘onadagi Samo kabi arenalarda o‘ynalishi yaxshiroq samara beradi.
Futzal klublarini badal to‘lovlaridan ozod etish.
O‘zPFL marketingni rivojlantirish orqali, badal olish tizimidan bosqichma-bosqich voz kechishni maqsad qilgan. Bunda birinchi galda futzal va ayollar futbolini badal to‘lovlaridan ozod etish masalasi bor. Klublar bu mablag‘ni o‘z harajatlari uchun ishlatishlari mumkin. Shuning ustida ishlaymiz.
