Baxtiyor Ashurmatov boshchiligidagi “Qo‘qon-1912” jamoasi 2021 yilgi futbol mavsumi uchun tayyorgarlikni boshladi. Jamoa a’zolari 4 yanvardan Qo‘qon shahrida yig‘ilishdi. Garchi kecha jamoaning barcha a’zolari Qo‘qon shahriga yetib kelishmagan bo‘lsa-da, murabbiylar dastlabki mashg‘ulotni o‘tkazishdi.
Qo‘qondagi 2-BO‘SMga qarashli stadionda bo‘lib o‘tgan mashg‘ulotlarda jamoa tarkibiga yangi qo‘shilgan hujumchi, sobiq “Mash’al” jamoasi - a’zosi Mo‘min Meliyev hamda o‘tgan mavsumni “Andijon” jamoasida o‘tkazgan Farhod Bekmurodov qo‘shilishgan.
Shuningdek, jamoa safida o‘tgan mavsumni “Turon” jamoasida o‘tkazgan himoyachi Shohruh Xolmatov, “Andijon”da to‘p surgan Azamat Isroilov va darvozabon Eldor Adhamov ham mashg‘ulotlarda ishtirok etishmoqda. Bu futbolchilar jamoa ko‘rigida bo‘lib turishibdi.
“Qo‘qon-1912”ning ayrim futbolchilari bugun Qo‘qonga yetib kelishadi. Jamoaning yetakchi futbolchilari - Murod Xolmuhammedov, Aleksandr Merzlyakov, Quvondiq Ro‘ziyev va Shohnazar Norbekov esa bosh murabbiyning ruxsatiga ko‘ra, biroz kechroq jamoa ixtiyoriga yetib kelishadi. Suhrob Berdiyev hamda Hamidillo Abduhamidov esa davolanish jarayonlarini davom ettirishmoqda, - deya xabar bermoqda, klub matbuot xizmati.
