Бахтиёр Ашурматов бошчилигидаги “Қўқон-1912” жамоаси 2021 йилги футбол мавсуми учун тайёргарликни бошлади. Жамоа аъзолари 4 январдан Қўқон шаҳрида йиғилишди. Гарчи кеча жамоанинг барча аъзолари Қўқон шаҳрига етиб келишмаган бўлса-да, мураббийлар дастлабки машғулотни ўтказишди.
Қўқондаги 2-БЎСМга қарашли стадионда бўлиб ўтган машғулотларда жамоа таркибига янги қўшилган ҳужумчи, собиқ “Машъал” жамоаси - аъзоси Мўмин Мелиев ҳамда ўтган мавсумни “Андижон” жамоасида ўтказган Фарҳод Бекмуродов қўшилишган.
Шунингдек, жамоа сафида ўтган мавсумни “Турон” жамоасида ўтказган ҳимоячи Шоҳруҳ Холматов, “Андижон”да тўп сурган Азамат Исроилов ва дарвозабон Элдор Адҳамов ҳам машғулотларда иштирок этишмоқда. Бу футболчилар жамоа кўригида бўлиб туришибди.
“Қўқон-1912”нинг айрим футболчилари бугун Қўқонга етиб келишади. Жамоанинг етакчи футболчилари - Мурод Холмуҳаммедов, Александр Мерзляков, Қувондиқ Рўзиев ва Шоҳназар Норбеков эса бош мураббийнинг рухсатига кўра, бироз кечроқ жамоа ихтиёрига етиб келишади. Суҳроб Бердиев ҳамда Ҳамидилло Абдуҳамидов эса даволаниш жараёнларини давом эттиришмоқда, - дея хабар бермоқда, клуб матбуот хизмати.
