«Milan» bosh murabbiyi Stefano Pioli Italiya chempionatining 17-turi doirasida «Torino»ga qarshi o‘yin (2:0) borasida o‘z fikrini bildirib o‘tdi.

«Tan olaman, bu natija meni hayron qoldirmadi. Men bu yigitlarni yaxshi bilaman. «Yuventus»ga qarshi o‘yindagi mag‘lubiyatdan keyin munosib javob qaytarishlarini kutgandim. Bahsning birinchi bo‘limi ajoyib o‘tdi. Ikkinchi taymda esa «Torino»ning bosimiga duch keldik.

Tonalli va Brahim Diasning jarohati? Hozircha menda ma’lumot yo‘q. Har ikki futbolchi yoqimsiz lat yeyishdi. Leauning keyingi o‘yinda ishtirok eta olmasligi meni g‘azablantirmoqda. Axir keyingi bahsni o‘tkazib yuborish xavfi ostida turgan futbolchi maydon markazida simulyasiya ishlatmaydi.

Ibrahimovichning mushagidagi jarohati ortda qoldi. Chorshanba kuni uni ko‘ramiz. Italiya kubogi bahsida qanday harakat qilarkan. Zlatanning tezroq formaga qaytishiga umid qilyapmiz.

Ertaga «Roma» — «Inter» bahsini albatta tomosha qilaman. Turnir jadvalidagi vaziyatdan kelib chiqib emas, ikki aqlli murabbiy o‘rtasida shunchaki yaxshi o‘yin bo‘lgani uchun uni ko‘raman», — dedi Pioli.