Niderlandiyaning KPMG auditorlik kompaniyasi moliyaviy tadqiqot o‘tkazib, Yevropa klublarida to‘p tepayotgan futbolchilarning narxini aniqladi. Bu haqda "Mundo Deportivo" xabar tarqatdi.

«Real»ning umumiy tarkibi 874,2 million yevroga baholandi. Madridliklarning eng qimmat futbolchisi sifatida yarim himoyachi Kazemiro tan olindi. Braziliyalik futbolchi 72,6 million yevroga baholandi. Undan keyin pog‘onalarni himoyachi Rafael Varan (70,2 million) va darvozabon Tibo Kurtua (67,9 million) band etishdi.

«Bavariya»ning barcha futbolchilari narxi esa 943,4 million yevroni tashkil qildi. Myunxenliklar safida yarim himoyachi Serj Gnabri eng qimmatbaho o‘yinchiga aylandi — 99,8 million yevro. Himoyachi Yozua Kimmix (98,3 million) va yarim himoyachi Leroy Sane (85,8 million) keyingi o‘rinlarni egallashdi.

«Yuventus»ning eng qimmat o‘yinchisi deya himoyachi Matteys de Ligt e’tirof etildi — 90 million yevro. Ikkinchi pog‘onani esa hujumchi Paulo Dibala (65,2 million) egallagan bo‘lsa, Krishtianu Ronaldu kuchli uchlikka kirdi (63,2 million). «Keksa sinyora»ning umumiy narxi 734,8 million yevroga teng bo‘ldi.

«Liverpul» tarkibi esa 1,094 milliard yevroga baholandi. Mersisaydliklar safida narxi baland futbolchi sifatida Muhammad Saloh tilga olindi — 122,2 million yevro. Misrlik futbolchi narx borasida Sadio Mane (120 million) va Trent Aleksander-Arnoldni (107,1 million) ortda qoldirdi.

Hujumchi Kilian Mbappe «PSJ»ning eng qimmatbaho o‘yinchisi deb e’lon qilindi — 200 million yevro. Hujumchi Neymarning narxi 125 million yevroga teng bo‘ldi. Bu borada Markinyos uchinchi o‘rinni egalladi — 59,9 million. Parijliklarning umumiy narxi 806,6 million yevroga baholandi.