Bugun "Bunyodkor" «Hokim Kubogi»da dastlabki o‘yinini o‘tkazadi. Musobaqa oldidan "Qaldirg‘ochlar" sardori Lutfulla To‘rayevning fikrlari bilan qiziqdik.
- Bu kabi turnirda birinchi marta qatnashyapman. Shaxsan menga «Hokim Kubogi» musobaqasi qiziq ko‘rinyapti. Kecha mashg‘ulotdan oldin murabbiyimiz Marat Valentinovich bir yaxshi gapni aytdi. Qanday turnirga kelishingdan va raqibing kim bo‘lishidan qat’iy nazar, ijobiy natija bilan ortga qaytish kerak. Musobaqaga uzoq masofadan yo‘l bosib kelib, shunchaki qaytib ketish kerak emas. Shuning uchun biz ham Farg‘onaga shunchaki kelmadik. Musobaqada qatnashib, kubok bilan ortga qaytishni maqsad qilganmiz va albatta buning uchun bor imkoniyatimizni ishga solamiz, mehnat qilamiz. Futbolchilarning kayfiyati a’lo darajada. Mashg‘ulotlarni boshlaganimizga uch hafta bo‘ldi. Bir-birimizni to‘liq tushunib olishimiz va kuchli jamoaga aylanishimiz uchun bu muddat kifoya deb o‘ylayman. Professional futbolchiga raqibning ahamiyati bo‘lmasligi kerak. Bu hammaga tegishli gap, shu qatorda bizga ham. Nasib, hammasi yaxshi bo‘ladi va o‘ylagan niyatimizga yetamiz.
