“Sherlar” 30 yanvar kuni nazorat uchrashuvida Dubayda “Spartak” bilan maydonga tushadi.

Rasmiy o‘yinlarda oxirgi marta "Paxtakor" "Spartak" bilan 1991 yil 19 oktyabr kuni SSSR chempionati doirasida to‘qnash kelib, Andrey Pyatniskiyning yagona goli evaziga g‘alaba qozongan.

O‘tgan yili fevral oyida, Moskvada jamoalar "Otkritiye Arena" stadionida o‘rtoqlik bellashuvida ishtirok etishgandi. Ushanda "Spartak" 4:0 hisobida zafar quchgandi.

Rasmiy o‘yinlar toifasida “Paxtakor” moskvaliklar bilan 47 bor uchrashuv o‘tkazgan. Ularning 8 tasida “Sherlar” g‘alabaga erishgan bo‘lsa, 18 bor tomonlar durang natija qayd etishgan. 21 marta “Spartak” zafar quchgan.

“Paxtakor” raqib darvozasiga 43 to‘p kiritgan bo‘lsa, Moskva jamoasi 78 bor gol urishni uddalagan. “Spartak” o‘z tarixida 12 bor SSSR chempionati, 10 marta SSSR Kubogi, 10 marta Rossiya chempionati va 3 bor Rossiya Kubogini qo‘lga kiritgan. Ayni paytda jamoani germaniyalik mutaxassis Domeniko Tedesko boshqarmoqda.

“Spartak” va “Paxtakor” jamoalari o‘rtasidagi nazorat bahsi 30 yanvar, shanba kuni Toshkent vaqti bilan soat 17:00da Dubaydagi "Jebel Ali" majmuasi maydonida boshlanadi.