«Bunyodkor» «Hokim Kubogi-2021»ning eng kuchli to‘rt jamoasidan biri bo‘lib turibdi. Ertaga final yo‘llanmasi uchun Farg‘onaning «Neftchi» klubiga qarshi maydonga tushadigan «qaldirg‘ochlar»dan biri Nurillo To‘xtasinovning fikrlari bilan qiziqdik.

- «Hokim Kubogi» musobaqasi biz uchun yangi mavsumga tayyorgarlik vazifasini o‘tab beryapti. Garchi turnirni nisbatan omadsizroq boshlagan bo‘lsak-da, 2-turdayoq o‘z o‘yinimizni topib oldik va guruh bosqichini birinchi o‘rinda yakunladik. Guruh uchrashuvlarida o‘yinimizni qovushmaganini maydonning holati bilan ham bog‘lagan bo‘lardim. Zero, biz paslarga asoslangan o‘yin namoyish qilamiz. Tabiiyki, bunday o‘yin ko‘rsatish uchun tekis maydon kerak bo‘ladi. Shu tomondan maydonga moslashish va o‘z o‘yinimizni ko‘rsatishimiz biroz qiyin kechdi.

Raqibga nisbatan hurmatni saqlagan holda aytishim kerak, chorak finaldan nisbatan osonlik bilan o‘tdik. Bu natijada ham o‘z aksini topdi. Endi yarim finalda rostakamiga jiddiy raqibga qarshi maydonga chiqamiz. «Neftchi» musobaqaga g‘olibi bo‘lishga asosiy da’vogar jamoa. Lekin biz ham shu yergacha keldikmi, ortga qaytish yo‘q. Qolaversa, maydonlarga moslashib ulgurdik. O‘ylaymanki, o‘z o‘yinimizni ko‘rsata olsak, final yo‘llanmasini qo‘lga kirita olamiz.