Futzal bo‘yicha milliy terma jamoamiz Argentina bilan ikkinchi bahsda ham ishtirok etdi va kichik, 0:1 hisobida imkoniyatni boy berdi.
Uchrashuvdan so‘ng, terma jamoamiz yordamchi murabbiyi Nodir Eliboyev o‘z fikrlari bilan o‘rtoqlashdi.

"Hal qiluvchi pallada mahorat o‘z so‘zini aytayotgani ko‘rinib qolyapti. O‘ylaymanki, biz kechagiga nisbatan bugun yaxshiroq o‘ynadik. Men, raqiblarimiz o‘z o‘yinini namoyish etmadi deb ayta olmayman. Ular kechagiga nisbatan bugun ko‘proq ter to‘kishdi.

Biz to‘p nazoratini saqlashga imkon qadar harakat qildik. Kecha 4 nafar futzalchimiz jarohat olgan bo‘lsada, boshqa futzalchilar ancha yaxshi o‘yin namoyish etishdi. Barcha muxlislar guvohi bo‘lishdi, yigitlar borlarini berib harakat qilishdi.

Biz Argentina terma jamoasining kechagidan yaxshiroq tayyorgarlikda maydonga tushub kelishini bilgandik. Shu sababli biz Abbosni tanladik. U raqib hujumini buzish barobarida oldingi chiziqlarda ham faollik ko‘rsata oladigan darvozabon.

Ko‘pchilik bot-bot takrorlaydigan darvoza chizig‘imizda Rustam Umarovdan keyin munosib nomzod yo‘qligi haqidagi gaplarga men o‘ylaymanki, bunday o‘yinlardan keyin nuqta qo‘yiladi. Biz Afrika chempioni bilan o‘ynadik mana endi jahon chempioni.

Ko‘rib turganingizdek o‘sishda davom etamiz. Bu o‘yinlar bizga va yigitlarga katta tajriba bo‘ldi. O‘z kamchiliklarimizni ko‘rdik va bu yog‘iga ularni bartaraf etamiz.