AGMK jamoasi seleksiya ishlarini jadallik bilan davom ettirmoqda va klub navbatdagi transferga qo‘l urdi.

Katta futbolda aynan Olmaliqda muvaffaqiyat qozongan va nom taratgan tajribali futbolchi Sanjar Shoahmedov ma’lum tanaffusdan so‘ng yana jonajon jamoasiga qaytdi.

O‘tgan mavsumni Malayziyaning "Terengganu" safida o‘tkazgan mahorat sohibi endilikda yana jamoamiz a’zosiga aylandi. Klub Sanjar Shoahmedov bilan 2021 yil yakuniga qadar shartnoma imzoladi.

Sanjar Shoahmedov 1990 yil 23 sentyabrda tavallud topgan. 2010-2014 yillar davomida AGMK sharafini himoya qilgan hamda 2015-2016 va 2017-2018 yillar mobaynida Toshkentning "Lokomotiv" jamoasida o‘ynab, klubning muvaffaqiyatli mavsumlarida chempionlikni qo‘lga kiritilishida katta hissa qo‘shgan. 2017 yilda esa Qatarda "Al Sayliya" sharafini himoya qilgan hamda 2019 yildan e’tiboran ikki mavsum Malayziyada "Terengganu" safida yetakchiga aylanib, muvaffaqiyatli faoliyat yuritgan.

Sanjar Shoahmedov 10 yillik faoliyati davomida jami 283 o‘yin o‘tkazgan va 65ta golga mualliflik qilgan.

"Jonajon jamoamga qaytganimdan xursandman. AGMK tubdan o‘zgargan va katta maqsadli jamoaga aylangani quvonarli. Yaxshi muhit va chinakam bir oilaga aylangan jamoada ekanligimdan baxtiyorman. Maqsadlar ulkan va endi yana sevimli muxlislarimiz ishonchini oqlashga harakat qilaman. Menga ishonch bildirayotgan jamoa bosh murabbiyi Mirjalol Qosimov va klub rahbariyatiga minnatdorchilik bildiraman. O‘ylaymanki, AGMK yangi mavsumda yanada muvaffaqiyatli o‘ynab, Olmaliq shahriga katta quvonch taqdim etadi", — dedi Sanjar Shoahmedov.