O‘zbekiston milliy jamoasi bosh murabbiyi Vadim Abramov "Zenit"ga qarshi bo‘lib o‘tgan o‘rtoqlik o‘yinidan so‘ng o‘z fikrlari bilan o‘rtoqlashdi.

"Afsuski, mag‘lubiyatga uchradik. 0:4 hisobi esa... "Zenit" bir necha kundan keyin rasmiy o‘yinlarda ishtirok etadi. Shu bois, ularning tayyorgarligi biznikiga nisbatan yaxshiroq. Bizda esa hali mavsum boshlanmagan, milliy jamoaning rasmiy o‘yiniga bir oydan oshiq vaqt bor.

Shunga qaramay, 0:4 — biz uchun bu haddan tashqari yirik hisob. Iordaniya bilan o‘yin qanday bo‘lar ekan, ko‘ramiz. Safimizda ko‘p futbolchilarning yo‘qligi ham o‘z ta’sirini ko‘rsatmoqda. Zaxira o‘yinchilarimizni sinovdan o‘tkazib olyapmiz.

Hisobdan ranjigan muxlislarimizni tushunaman. Buncha ko‘p o‘tkazib yuborganimizdan o‘zimizning ham hafsalamiz pir bo‘ldi. Bu yig‘in yangi o‘yinchilarning imkoniyatlarini bilib olish uchun tashkil qilingan. Kelajakda turli vaziyatlarga duch kelishimiz mumkin. Shu bois, hamma narsaga tayyor bo‘lishimiz kerak", — dedi Abramov O‘FA matbuot xizmatiga bergan intervyusida.