Ўзбекистон миллий жамоаси бош мураббийи Вадим Абрамов "Зенит"га қарши бўлиб ўтган ўртоқлик ўйинидан сўнг ўз фикрлари билан ўртоқлашди.

"Афсуски, мағлубиятга учрадик. 0:4 ҳисоби эса... "Зенит" бир неча кундан кейин расмий ўйинларда иштирок этади. Шу боис, уларнинг тайёргарлиги бизникига нисбатан яхшироқ. Бизда эса ҳали мавсум бошланмаган, миллий жамоанинг расмий ўйинига бир ойдан ошиқ вақт бор.

Шунга қарамай, 0:4 — биз учун бу ҳаддан ташқари йирик ҳисоб. Иордания билан ўйин қандай бўлар экан, кўрамиз. Сафимизда кўп футболчиларнинг йўқлиги ҳам ўз таъсирини кўрсатмоқда. Захира ўйинчиларимизни синовдан ўтказиб оляпмиз.

Ҳисобдан ранжиган мухлисларимизни тушунаман. Бунча кўп ўтказиб юборганимиздан ўзимизнинг ҳам ҳафсаламиз пир бўлди. Бу йиғин янги ўйинчиларнинг имкониятларини билиб олиш учун ташкил қилинган. Келажакда турли вазиятларга дуч келишимиз мумкин. Шу боис, ҳамма нарсага тайёр бўлишимиз керак", — деди Абрамов ЎФА матбуот хизматига берган интервьюсида.