Mashg‘ulot mahali maydon chetida turganlar suhbatidan:

– Ijtimoiy tarmoqlarda har gal “Paxtakor”ning Qibray bazasi maydonidagi mashg‘ulotidan rukni ostida suratlarni tomosha qila turib bir fikr xayolimdan o‘tadi – so‘z boshladi suxbatdoshlardan biri, – Eh Shota-SHota; Sening o‘zbek futboli, “Paxtakor” uchun qilgan mehnatingni qanday baholay? Senga Qibraydagi bazani zamonaviy ko‘rinishga keltiraylik deyishganda, u yerning uzoqligini ro‘kach qilib, shahar markazidan uzoqlashishdan cho‘chiding; jamoa kelajagini emas, o‘zingni o‘ylading. Bu ham mayli, butun jamoani ijarada – mehmonxonada yashatding. Senga birov Qibrayga kelib yasha degani yo‘q edi, shunchaki “to‘g‘ri, top-jamoaning zamonaviy uyi bo‘lishi kerak”, deb baza rekonstruksiyasiga turtki bersang bo‘ldi edi. Sportchi uchun shaharning markaziy chorrahasidagi diqqinafas mehmonxonada yashab; chang-gubor yutib yugurgan qayda-yu, Qibrayning tinch, toza havosida... Shuncha yil jamoaning mehmonxonada yashagani-yu, o‘zimizning bir qora ko‘z tengi legioner hujumchingga ketgan mablag‘ga baza-yu maydonlarni, qo‘yingki, kerak bo‘lsa, akademiya va stadioni bilan butun kompleksni zamonaviy ko‘rinishga keltirib olish mumkin edi. Mana, jamoa baribir borarkan o‘sha yerga...

– Qo‘ysangiz-chi, shaxsiy klub bo‘lsa, pul o‘ziniki, nimaga sarflash o‘ziga havola, – jon kuydirib gapirayotgan suhbatdoshining so‘zini bo‘ldi sherigi.

 – To‘g‘ri, biz aralasha olmaymiz, ammo keng imkoniyatlar bo‘lgan davrdagi shu ishlar bahonasida "Paxtakor" eng zamonaviy bazaga ega bo‘lib qolarmidi, tanigan-tanimaganlar ham “Bularning barchasi Shota davrida bo‘lib qolgan, baraka topsin”, deb duo qilib yurarmidi deyman-da...

– Birgina "Nasaf" bazasi ortidan hamon futbol ishqibozlari duosini olayotgan, Xudo rahmat qilsin Nuriddin aka Zayniyev kabi demoqchisiz-da...

Murabbiyning mashg‘ulot tugaganini bildirib qattiq chalgan hushtagi suhbatni bo‘ldi...

Abror Pirriyev
O‘zbekiston milliy jamoasi va "Lokomotiv" klubi shifokori.