“Humo arenada” dzyudo bo‘yicha Toshkent “Katta dubulg‘a” musobaqasining ikkinchi kunida final bellashuvlari davom etmoqda. Biroz avval hamyurtimiz Gulnoza Matniyozova (-70 kg) hamda Obidxon No‘monov (-73 kg) bronza medali uchun tatamiga chiqishdi.

Quvonarlisi, sloveniyalik Anka Pogachnikka qarshi tatamiga chiqqan Gulnoza bellashuvni g‘alaba bilan yakunladi va bronza medaliga sazovor bo‘ldi. Ahamiyatlisi, bu Gulnoza uchun faoliyatida “Katta dubulg‘a” musobaqasidagi ilk medal bo‘ldi. Shu bilan birga hamyurtimiz Tokio Olimpiadasi reytingi yo‘lida 500 ochkoni ham o‘z hisobiga qo‘shib qo‘ymoqda.

Afsuski, -73 kg vazn toifasida bronza medali uchun tatamiga chiqqan Obidxon No‘monov tajribali raqibi, Rio-2016 Olimpiya o‘yinlari finalchisi Rustam Orujovga imkoniyatni boy berib qo‘ydi.

Bugungi dasturning eng so‘nggi bellashuvida -81 kg vazn toifasida hamyurtimiz Sharofiddin Boltaboyev italiyalik Kristian Parlatiga qarshi oltin medal uchun bahs olib boradi.