"Buxoro" klubi tajribali yarim himoyachisi Suhrob Ne’matov klub matbuot xizmatiga intervyu berdi.

"Mavsumga tayyorgarlikning 3-bosqichini o‘z qarorgohimizda o‘tkazib olib, so‘nggi bosqichini yana Toshkent shahrida davom ettiryapmiz. Mashg‘ulotlar kuniga ikki mahaldan olib borilyapti. Sharoitlar a’lo darajada desam mubolag‘a qilmagan bo‘laman, jamoadoshlarimning kayfiyati ajoyib.

Murabbiyimiz Davron Fayziyev bizdan nima istayotganini, mashg‘ulotlar davomida tushunib boryapmiz, Davron aka jismoniy holatimizga ham qattiq urg‘u beryapti.

Jamoaning bu yilgi maqsadi hammaga ma’lum, ya’ni superliga yo‘llanmasining biriga egalik qilish, buni barchamiz ich-ichimizdan his qilib, bir maqsad sari intilyapmiz. Jamoada yaxshi futbolchilar yig‘ilgan, tarkibimizda superliga havosidan bahramand bo‘lgan bir qator futbolchilar yangi mavsumga tayyorgarlik olib boryapti. Nasib qilsa, ko‘zlagan marramizni bosib o‘tishga, barchamiz ishonamiz.

To‘g‘risi, stadionni to‘ldirib turgan muxlislarimizni sog‘indik, pandemiya tufayli o‘tgan mavsumda bo‘sh tribunalar qarshisida to‘p surib, yana bir bor shunga amin bo‘ldimki, futbol muxlislar bilan qiziq ekan. Fursatdan foydalanib, muxlislarimizdan bir narsani iltimos qilib qolar edim, futbolda har qanday vaziyatlar uchrab turadi, natijalar salbiy bo‘lib qolishi mumkin, nima bo‘lgan taqdirda ham, bizga ishonib, dalda berib, qo‘llab quvvatlashlarini so‘rab qolardim", — dedi Ne’matov.