"Olimpik" klubi bosh murabbiyi Temur Kapadze Pro-liganing 2-turidan o‘rin olgan "Oqtepa"ga qarshi o‘yindan keyin o‘z fikrini bildirib o‘tdi.

«Neftchi» bilan bahsdan so‘ng bugungi o‘yinga yaxshi tayyorgarlik ko‘rgan edik. Raqibni qanday o‘ynashidan xabarimiz bor edi, ularni o‘rgangandik. Tarkibida yaxshi saviyadagi futbolchilar bor, ayniqsa markazdagi kolumbiyalik futbolchisini ajratib ko‘rsata olaman. Shuning uchun yigitlarni ushbu uchrashuvga har tomonlama tayyorlashga harakat qildik. Ko‘rganingizdek o‘yinimiz yaxshi chiqdi. To‘g‘ri, qaysidir pallada bo‘shliqlar yuzaga kelgan bo‘lishi mumkin. Umuman olganda, futbolchilar yaxshi o‘yin namoyish qilishdi. Ko‘p vaziyatlar yaratdik. Ulardan foydalanishda ayrim holatlarda tajriba yetishmasligi o‘z so‘zini aytdi. Xatolarni tahlil qilib, ustida ishlaymiz. O‘ylaymanki, o‘yindan o‘yinga harakatlarimiz yanada yaxshilanib boradi. O‘ziga bo‘lgan ishonchi ortib boradi.

— Jamoaviy o‘yin raqib jarima maydonchasiga kelganda yo‘qolib qolyapti.
— Maydon biroz quruqroq bo‘lgani uchun ko‘p vaziyatlarda to‘p to‘xtab qolaverdi. O‘yinda eng qiyini gol urish. Jarima maydonchasiga kelganda futbolchilarga xotirjamlik va tajriba yetishmadi. Yosh futbolchilar bunda o‘yinlarda toblanishadi.

— Siz odatda jamoaviy o‘yinni yo‘lga qo‘yasiz. Ammo bugun futbolchilar individual jihatlarini namoyish qilish istagi ustunlik qilgandek ko‘rindi.
— Himoyalanayotganimizda jamoaviy harakatlar muhim hisoblanadi. Oldingi chiziqda esa individual harakatlar katta sahnaga chiqadi. Futbolchilarga har doim raqib borligini, aql bilan to‘p tepish kerakligini ta’kidlayman. Himoyadagi individual xatolar o‘zini oqlamasligi mumkin. Lekin oldindagilar aldab xato qilsa boshqa gap. Lekin qayerda aldash kerak yoki to‘pni uzatish kerakligini tushuntirib, ongiga singdirib boryapmiz.