O‘zbekiston milliy terma jamoasi bosh murabbiyi Vadim Abramov Iroqqa qarshi bo‘lib o‘tgan o‘rtoqlik o‘yini (0:1) borasida o‘z fikrini bildirib o‘tdi.

"Avvalo, muxlislardan uzr so‘ramoqchiman. Ob-havo sovuq bo‘lishiga qaramay, bugun ko‘plab ishqibozlar stadionga tashrif buyurishdi. Bugun ularni xursand qilishni istagandik. O‘yin yaxshi bo‘ldi, deb o‘ylayman. Iroq tayyorgarlik jarayoni uchun yaxshi raqib vazifasini o‘tab berdi. G‘alaba qozongan o‘yinda kamchiliklaringni ko‘rish qiyin, mag‘lub esa xato va kamchiliklarimizni ochib beradi. Tayyorgarlikni davom ettiramiz.

O‘ylashimcha, safimizda yaxshi yigitlar yig‘ilgan, ular bilan oldimizga qo‘yilgan vazifalarni uddalay olamiz.

O‘zimizni oqlash bo‘lib ko‘rinishi mumkin. Ammo fakt shundaki, Iroq 22 mart kuni Toshkentga uchib kelib, shu yerda o‘yinga tayyorgarlik olib bordi. Biz esa 26 mart kuni Namanganda o‘yin o‘tkazib, so‘ngra Toshkentga qaytib keldik. Biz bugungi o‘yinga butunlay yangilangan tarkibni tushirishimiz mumkin edi. Ammo stadionga kelgan muxlislar hurmati eng kuchli tarkibni tushirib, ularni xursand qilishni istagandik. Boshqa tomondan, Saudiyadagi turnirda har uch kunda o‘yin o‘tkazishimizga to‘g‘ri keladi. Shunga ham ko‘nikma hosil qilishimiz kerak edi.

Iroq bizning o‘yinimizni yaxshi o‘rgangan holda, qarshi hujumda o‘ynashga tayyorgarlik ko‘rgani ko‘rinib turdi. Agar birinchi bo‘limda gol ura olganimizda, uchrashuv butunlay boshqacha kechishi mumkin edi.

Sergeev avvalgi o‘yinda jarohat olgani uchun bugungi o‘yinda ishtirok eta olmadi. Shahzod Ubaydullayevning maydonga tushirmaganimning sababi shundaki, bizga gol kerak edi va Shomurodovni o‘yin oxiriga qadar maydonda qoldirishga qaror qildim. U ikkita o‘yinda gol ura olmaganidan ranjidi. Shunga qaramay, Eldor hujumdagi muammolarimizni hal qila olishiga ishonaman", — dedi Vadim Abramov.