"Olimpik" — "Buxoro" o‘yini Toshkentga ko‘chirilgani borasida xabar chiqdi. Izohlarda "Olimpik"ni qo‘llash-boshlandi qabilidagi gap-so‘zlar boshlandi.

Bizning eng katta muammolarimizdan biri — masalaning mohiyatini aniq tushunib yetmaslik. Aslida "Buxoro" stadioni futbol uchrashuvlarini qachondan boshlab qabul qilishi asosiy savol hisoblanadi. To‘liq 2020 yil davomida "Buxoro"lik futbol muxlislari o‘z arenalarida o‘yin ko‘rish imkoniga ega bo‘lishmadi. Klub uy uchrashuvlarini Muborakda o‘tkazdi.

Shu yil yanvarida "Buxoro" klubi stadion 1 aprelga tayyor bo‘lishi borasida xat berdi. Bugun 31 mart, biroq stadion katta ehtimol bilan birinchi davra yakuniga qadar ham shay bo‘lmaydi. G‘ijduvondagi stadion ta’miri qachon yakuniga yetishi borasida bizda aniq ma’lumot mavjud emas. Vaholanki, UzReport bilan hamkorlikda "Buxoro"dan ham teletranslyasiyani amalga oshirish ustida ishlayotgandik.

"Olimpik" klubi ikki davra uchrashuvlari mezbonligini almashishga rozi bo‘lib, qaysidir ma’noda "Buxoro"ga yordam berdi. Ammo O‘zPFL 6 aprel sanasiga qadar "Buxoro" stadion masalasini hal qilmasa, uning keyingi uchrashuvlarini qaytarmaslik sharti bilan mehmon jamoalar stadionlariga ko‘chiradi.

"Buxoro" futbol klubi 2020 yildan qolib kelayotgan qarzlarini hozirga qadar to‘liq bartaraf etmaganiligida ham O‘zPFL yoki "Olimpik"ning aybi yo‘q. Klub o‘z ichki muammolarini to‘la hal etib olishi shart. Aslida esa klub 1 martga qadar qarzdorlikdan to‘liq qutilishi qo‘mita tomonidan belgilab qo‘yilgandi. Ammo ko‘ryapsizki, bu muddat ham o‘tib ulgurgan.

Diyor Imomxo‘jayev.