Toshkentning "Paxtakor" klubi Superliganing to‘rtinchi turida o‘z maydonida "Metallurg"ni qabul qildi (2:1). Ushbu uchrashuvdan so‘ng mehmonlar bosh murabbiyi Jasur Abduraimov fikrlarini bildirib o‘tdi.
 
— "Paxtakor 2:1 hisobida g‘alaba qozondi. O‘yinning o‘ziga yarasha yutuq va kamchiliklari bo‘ldi. Umuman olganda, ikki jamoa ham yaxshi o‘yin o‘tkazdi, deya olaman, – dedi Jasur Abduraimov uchrashuv haqidagi dastlabki xulosasida.

— Yaqinda murabbiylar shtabida o‘zgarishlar yuz berdi. Yangi murabbiylarni o‘zingiz taklif qildingizmi yoki klub rahbariyati?
— Bosh murabbiy doim yangi jamoaga o‘zining yordamchilari bilan keladi. Hamma joyda shunday. Ularni o‘zim taklif qildim.

— Zohid Abdullayevning almashtirilishi qay darajada to‘g‘ri bo‘ldi?
— Uning yoshini bilasizmi? Zoxid Abdullayev 37 yoshda. U charchadi. Ivan Nagayevga ishonch bildirdik. Balki ikkita hujumchi bilan o‘ynashimiz kerakdir. Buning ustida mashg‘ulotlarda ishlaymiz. Hujumchilarning ikkisi ham tezkor. Nagayev esa jarohatdan so‘ng hali o‘zining to‘liq sport formasini tiklab ulgurmagan.

— Qanotlarda tezkor futbolchilar bo‘lishi kerak. Bugun qanotlarda o‘ynagan futbolchilarga tezkorlik yetishmadi...
— Bu tarkibni men yig‘maganman. Qo‘l ostimdagi bor futbolchilar bilan davra oxirigacha o‘ynaymiz. Barcha futbolchilar harakat qilmoqda. "Paxtakor"da mahoratli ijrochilar bor. Shuncha yil bu klubda o‘zim ishladim. Ularni yaxshi bilaman. Qaysidir vaziyatda omad yetishmadi. Vaziyatlardan foydalana olmadik. Menimcha, "Paxtakor" va "Metallurg"da vaziyatlar teng bo‘ldi.

— O‘yin davomida hakamga nisbatan e’tirozlaringiz ko‘p bo‘ldi...
— Futbol – hissiyotli o‘yin. Har qanday murabbiy o‘yingacha mehnat qiladi. Oddiy misol, birinchi golni qarang. Men nazoratchi emasman. Murabbiyman, vazifam – futbolchilarni shug‘ullantirish. Yevropaga o‘xshab hujumkor o‘yinni yo‘lga qo‘yishga harakat qilamiz. Hamma xato qiladi. 50 ga 50 vaziyatlarda adashsa, mayli. Nimaga bizda futbol yo‘q?  Sal itarib yuborsa, jarima zarbasi belgilanmoqda, ozgina narsaga ham o‘yinni to‘xtatmoqda. Hakamlarga nazoratchilar qarashi kerak. Futbol shaxmat emas, "kontaktli" o‘yin.