Katta boks oqshomining yana bir jangida Bahodir Jalolov Kristaps Zuisga qarshi ringga ko‘tarildi va raqibini nokaut evaziga mag‘lub etdi. Shundan so‘ng, bokschimiz jang haqida fikrlari bilan o‘rtoqlashdi.
"Xudoga shukur deyman. Xalqimiz oldida yuzimiz yorug‘ bo‘ldi. Bundan keyingi maqsadlarimiz bundanda katta. Oldinda Olimpiada o‘yinlari turibdi. Biz qo‘ldan kelgancha harakat qilamiz va oltin medallar uchun ringga ko‘tarilamiz. Hali bu boshlanishi".
- Raqibingizning o‘zi sizning qo‘lingizni ko‘tardi, bunga nima deysiz?
"Albatta, uning o‘zi meni hurmat qilishini va janglarimni kuzatib borishini aytdi. Men ham raqibimga chiroyli boks ko‘rsatgani uchun minnatdorchiligimni bildirmoqchiman. Chunki, ayrim og‘ir vaznli bokschilar o‘zini yomon tutadi. Bu raqibim esa ringdan hurmat bilan chiqib ketdi va uning ham kelgusidagi ishlariga omad tilayman".
- Ushbu g‘alabangizni kimga bag‘ishlaysiz?
"Men ushbu g‘alabamni onamga bag‘ishlayman va yurtboshimiz Shavkat Miromonovichga. Chunki, bizga juda yaxshi sharoitlar yaratilib berildi. Hatto, Amerikada bunaqa darajada o‘tmaydi bunday kechalar. Hozir amerikalik ustozlarimni bu atmosferani ko‘rib og‘zi ochilib qolgan. Men bundan juda ham hursand bo‘ldim. Xudo xohlasa O‘zbekiston kelajagi buyuk davlat va biz bu uchun qo‘limizdan kelgan barcha ishni qilamiz".
