Kuni kecha Rossiya sanoat va savdo vaziri Denis Manturov boshchiligidagi delegasiya yurtimizga tashrif buyurdi. Tashrifdan ko‘zlangan asosiy maqsad 5-7 aprel kunlari Toshkentdagi «O‘zekspomarkaz» milliy ko‘rgazmalar markazida o‘tkaziladigan xalqaro sanoat ko‘rgazmasida ishtirok etish. Unda ishtirokchi mamlakatlar va kompaniyalar o‘rtasida sanoat kooperasiyasini kengaytirish, sanoatni rivojlantirish va qo‘shma korxonalar tashkil etishning yangi imkoniyatlarini ko‘rib chiqiladi.
Bugun Toshkent shahar hokimligi huzuridagi jamoatchilik kengashi sport sektori rahbari Dilshod Haitmetov hamrohligida Sverdlovsk viloyati jamoat palatasi raisi, o‘z vaqtida «Ural» futbol klubida vise-prezident lavozimida faoliyat yuritgan Levin Aleksandr Yuryevich «Bunyodkor» futbol klubiga tashrif buyurdi. Mehmonlarni «Bunyodkor» direktori Ulug‘bek Mirzayev kutib oldi
Martabali mehmon tashrifni «Bunyodkor» akademiyasidagi sharoitlar bilan tanishishdan boshladi. So‘ng asosiy jamoamizning mashg‘ulotlarini kuzatgan rossiyalik mehmonlar «Bunyodkor» stadioni va muzeyini ham ko‘zdan kechirishdi. Klubimiz direktori, Aleksandr Yuryevichni o‘zbek futboli bilan tanishtirar ekan, o‘z navbatida martabali mehmon o‘z zukkoligi bilan mezbonlarni ajablantirdi. Ya’ni u sobiq Ittifoq chempionatida mamlakat yetakchilarining «bosh og‘rig‘i» bo‘lgan xalq jamoasi - «Paxtakor» va uning o‘yinchilarini, xususan, Gennadiy Krasniskiy haqida yaxshi bilishini aytib o‘tdi. Qolaversa, mustaqillik yillarida o‘zbek futboli erishgan yutuqlarini ham esladi. Shuningdek, o‘z vaqtida jahon yulduzlari Krishtianu Ronaldu va Lionel Messining Toshkentga tashrifi, Rivaldo kabi «Oltin to‘p» sohibini «Bunyodkor» libosida to‘p surganini ham yod oldi.
Ma’lum muddat Rossiya premyer ligasi ishtirokchisi bo‘lgan jamoada vise-prezident lavozimida ishlagan, katta futbolning havosini tushungan Aleksandr Yuryevich bilan «Bunyodkor» va «Ural»ning o‘zaro hamkorlik masalalari ham muhokama qilindi. Xususan, har ikkala klubning akademiya jamoalari navbati bilan Toshkent hamda Yekaterinburg shaharlariga tashrifini amalga oshirish bo‘yicha kelishib olindi. Xabaringiz bor, 2020 yil «Bunyodkor» tashkil topganiga 15 yil bo‘ldi. Katta tantanalar bilan nishonlash maqsad qilingan mazkur yubiley pandemiya sababli qoldirilgan edi. Aleksandr Yuryevich bilan uchrashuv chog‘ida 15 yillik yubiley yana esga olindi va tadbirga «Ural» jamoasining asosiy tarkibi kelishi bo‘yicha dastlabki muzokaralar o‘tkazildi. Ahamiyatlisi, Aleksandr Yuryevich o‘z safida turli terma jamoalarning a’zolari bo‘lgan «Ural»ning Toshkentga to‘liq tarkib bilan kelishini xohlashini aytib, mazkur tadbirni FIFA kunlarida o‘tkazmaslikni so‘radi. Aks holda asosiy o‘yinchilar terma jamoalariga jo‘nab ketishi bois, O‘zbekistonga eng kuchli tarkib bilan kela olmasligini ta’kidladi.
Uchrashuv yakunida rossiyalik mehmon Ulug‘bek Mirzayev boshchiligidagi «Bunyodkor» delegasiyasini Yekaterinburgga taklif qildi.
