Ertangi «Yangiyer»ga qarshi bahs oldidan «Buxoro» yarim himoyachisi Anvar Jo‘rayevga bir necha savollar bilan yuzlandik.

— Anvar, «Olimpik» jamoasiga qarshi bo‘lib o‘tgan bahsda ushbu mavsumdagi ilk uchrashuvingizni o‘tkazdingiz. Ushbu o‘yin haqida qisqacha fikringiz.
— Ha men 22-29 mart kunlari O‘zbekiston yoshlar terma jamoasi bilan Turkiyada bo‘lib o‘tgan xalqaro turnirda ishtirok etib, so‘ngra jamoam safiga kelib qo‘shildim va «Olimpik»ga qarshi bahsda boshlang‘ich tarkibdan joy oldim. Bu mening «Buxoro» safida ushbu mavsumdagi ilk uchrashuvim bo‘ldi.

Biz har qanday raqibga qarshi jiddiy tayyorlanamiz, «Olimpik» ham shu qatorda. Murabbiyimiz har doim bir narsani takidlaydilar: maqsadimiz Superligaga chiqish ekan, raqibni katta kichikligiga qaramasdan, uni hurmat qilgan holda jiddiy qarash kerak, barcha uchrashuvlarda faqat g‘alabani ko‘zlab maydonga tushish kerak, deydilar. O‘yinga kelsak, shiddatli bahs bo‘ldi, hisobda oldinga chiqib olgach, qarshi hujumda harakat qildik. Bir qancha yaxshi vaziyatlardan foydalana olmagan bo‘lsakda, o‘yin so‘ngiga kelib ikkinchi golni kiritishga muvaffaq bo‘ldik. Maqsad sari intilishdan to‘xtamaymiz, maqsad esa aniq — «Buxoro»ni superliga qaytarish!

— 3 turda, 3 g‘alaba qo‘lga kiritildi, jamoa ichki muhiti qay darajada?
— Umuman olganda, barcha futbolchilar, murabbiylar shtabi va jamoa rahbariyati katta bir ahil oilaga aylangan. Jamoamizda o‘ziga ishongan yaxshi, ajoyib futbolchilar yig‘ilgan, har bir g‘alabadan keyin, o‘zimizga bo‘lgan ishonch tobora oshib bormoqda. Bosh murabbiyimiz Davron Orifovich har bir uchrashuv yakunlangach bizga bo‘lib o‘tgan o‘yinni unutib, barcha fikri xayolimizni keyingi bahsga qaratishimizni uqtiradilar. Qisqasi har bir o‘yinda, faqat va faqat g‘alaba qozonish uchun maydonga tushamiz.

— Ertaga «Yangiyer» jamoasi mehmoni bo‘lasizlar.
— Shunday, ertaga «Yangiyer» bilan kuch sinashamiz. Raqibni yaxshilab o‘rganib chiqdik, ushbu o‘yinga 100 foiz tayyormiz. Ertaga yana bir bor qadrdon muxlislarimizni xursand qilishga harakat qilamiz.