Bugun “Navbahor” PFK rahbariyati va murabbiylar shtabi, muxlislar yetakchilari ishtirokida umumiy yig‘ilish o‘tkazilib, unda 7 aprel kuni bo‘lib o‘tgan “Navbahor” – “Paxtakor” uchrashuvi payti va o‘yindan keyin ro‘y bergan voqealar, mavjud kamchiliklar aniqlanib, kelgusida shunday holatlarga yo‘l qo‘ymaslik masalasi muhokama qilindi.

Unga ko‘ra, klub vakillari va muxlislar har qanday holatda hissiyotlarni jilovlashlari, tartib-intizom talablariga qat’iy rioya etishlari talabi qo‘yildi. Jamoa murabbiylari va klub ma’muriyati xodimlari xatti-harakatlari, bildirilgan fikrlari uchrashuvlar davomida O‘FA va PFL mutasaddilari tomonidan kuzatib borilishi, ommaviy axborot vositalari diqqat e’tiborida bo‘lishi, shuningdek, huquqni muhofaza qilish organlari tomonidan javobgarlikka tortilishi mumkinligi haqida yana bir bor ogohlantirildi.

Yig‘ilishda muhokama qilingan masalalardan kelib chiqib, “Paxtakor”ga qarshi kechgan o‘yindagi kabi holatlar boshqa takrorlanmasligini ta’minlash, klub xodimlari va muxlislar yetakchilari odob-axloq me’yorlariga talab qilish lozimligi belgilandi hamda shu boradagi masalalarni amalga oshirish maqsadida yangi chora-tadbirlar rejasi ishlab chiqildi. Jumladan, fan-klub a’zolari bilan hamkorlikdagi ishlarni yanada takomillashtirish, ularning mukammal ishlashini ta’minlash, kuzatuv kameralari sonini ko‘paytirish, ovoz yozib olish uskunalarini o‘rnatish, odob-axloqqa amal qilish kerakligi bo‘yicha ogohlantiradigan belgilarni stadion hududi bo‘ylab o‘rnatish, sanitariya-gigiyena va karantin qoidalariga amal qilinishini ta’minlash, shaxslarning bino va texnik zonalarda harakatlanishini identifikasiya qiladigan tizimni takomillashtirish kabi chora-tadbirlar rejasi klub rahbariyati, “Markaziy” o‘yingoh direksiyasi, Namangan viloyat Milliy gvardiya boshqarmasi, Namangan viloyat IIB PPX va JTSB, Davlatobod tuman Tibbiyot birlashmalari bilan hamkorlikda amalga oshirilishi belgilandi.

“Navbahor” PFK matbuot xizmati.