O‘FA Tartib-intizom qo‘mitasi Navbahor — Paxtakor uchrashuvi borasida chiqargan qaroridan so‘ng O‘zPFL bosh diretori vazifasini bajaruvchi Diyor Imomxo‘jayev o‘zining telegram kanaliga quyidagicha post joyladi.

“FootWeek loyihasining Navbahor — Paxtakor o‘yiniga atalgan qismini ko‘rib chiqdim. Sizga ham tavsiya qilaman.

Bu yerdagi muhim nuqtalardan biri viloyat hokimi Shavkat Abdurazzoqovning uchrashuvni qanday tomosha qilib borishi, futbolchilarni qanday tanishi va jamoadagi muhit haqida qanchalik bilishi. Futbolchilarni tanishtirish marosimidagi kabi klubni Realga qiyoslash yana bir bor aytilgan. Biror jamoa Realga o‘xshasa albatta zo‘r. Chunki klub juda kuchsizlangan holida ham klasikoni o‘z foydasiga hal qilishi yoki Liverpulni o‘z uslubida yutaverishi, indamay chempionlik uchun kurashib yuraverishi mumkin.

Vodiygacha yo‘llar ham, vodiy taomlari ham, vodiydagi futbol va uning atmosferasi ham go‘zal. Bizning vazifamiz mana shu go‘zallikka dog‘ tushirmaslik.

Barcha futbol ixlosmandlaridan Ramazon oyida gina va qudratlarni unutishni so‘rayman. Biz barchamiz bir yo‘nalishda birlashganimizda kuchmiz. Sizni ishontirib aytamanki, men rahbarlik qilayotgan tashkilotda tarafkashlik yoki adolatsizlikka o‘rin yo‘q. Biz bunday ishlardan qo‘rqamiz. Va albatta talab hamma uchun barobar ekanini ham aytamiz. Muhimi yuzimiz O‘zining oldida yorug‘ bo‘lishi, qolgan hammasi o‘tkinchi narsalar.

Har bir oilada harakteri o‘zgacha, boshqalarnikiga o‘xshamaydigan kimdir bo‘ladi. Oila uni boricha qabul qilishga intiladi. Biz Navbahorni shunday yaxshi ko‘ramiz. Va u ham qolganlar kabi shu oila a’zosi ekanini unutmasligi kerak”, - degan Imomxo‘jayev.