O‘zbekiston Coca-Cola kubogi musobaqasining guruh bosqichi 1-turidan o‘rin olgan "Mash’al" — "Metallurg" (2:1) uchrashuvidan so‘ng mezbonlar bosh murabbiyi Aleksandr Xomyakov jurnalistlar savollariga javob qaytardi.

O‘yin haqida

— O‘yin to‘liq rejamizdagi kabi o‘tdi deya olmayman. G‘alaba qozonish yaxshi albatta, lekin o‘yindan to‘liq qoniqish hosil qilmadim. Hujumda va to‘p nazoratida bizga aniqlik yetishmagan xolatlar uchrab turdi. Bugungi o‘yinda o‘yin amaliyoti kamroq bo‘lgan futbolchilar tarkibimizda bor edi.

— "Mash’al" legionerlardan biri bilan xayrlashishi mumkinligi haqida xabarlar tarqaldi. Siz jamoangizdagi legionerlar faoliyatidan qoniqish hosil qilayapsizmi?
— Bizda legionerlar bilan xayrlashish rejasi yo‘q. Barcha futbolchilar mavsum davomida bizga kerak. Ayrim futbolchilarni ko‘rsayotgan o‘yini ko‘ngildagidek bo‘lmasligi mumkin. Lekin ular futbol uchrashuvlari davomida kuchayib borishadi, o‘yin amaliyoti ularni yanada kuchli qiladi.

— Garchi bugun "Mash’al" g‘alabaga erishgan bo‘lsa ham o‘z uyida ikkinchi jamoa sifatida harakatlandi. Bunga munosabatingiz qanday?
— Aytib o‘tdim, bugungi o‘yinimizdan qoniqish hosil qilganim yo‘q. Eng muhimi bugungi o‘yinda ba’zi rejalarimiz amalga oshdi. Bizga hujumda aniqlik yetishmagan xolatlar uchradi. Xuddi shu kabi vaziyatlar raqibda ham ko‘rindi.

— "Mash’al"da uzoq masofadan darvozaga zarba yo‘llaydigan futbolchi ko‘rinmayapti...
— Bugun ko‘rgan bo‘lsangiz Qo‘ziyev bir necha bor uzoqdan raqib darvozasiga zarba yo‘lladi. Bunday futbolchilar bizda bor. Eng muhimi natijaga erishdik, g‘alaba bilan barchani tabriklayman.