Ўзбекистон Coca-Cola кубоги мусобақасининг гуруҳ босқичи 1-туридан ўрин олган "Машъал" — "Металлург" (2:1) учрашувидан сўнг мезбонлар бош мураббийи Александр Хомяков журналистлар саволларига жавоб қайтарди.

Ўйин ҳақида

— Ўйин тўлиқ режамиздаги каби ўтди дея олмайман. Ғалаба қозониш яхши албатта, лекин ўйиндан тўлиқ қониқиш ҳосил қилмадим. Ҳужумда ва тўп назоратида бизга аниқлик етишмаган холатлар учраб турди. Бугунги ўйинда ўйин амалиёти камроқ бўлган футболчилар таркибимизда бор эди.

— "Машъал" легионерлардан бири билан хайрлашиши мумкинлиги ҳақида хабарлар тарқалди. Сиз жамоангиздаги легионерлар фаолиятидан қониқиш ҳосил қилаяпсизми?
— Бизда легионерлар билан хайрлашиш режаси йўқ. Барча футболчилар мавсум давомида бизга керак. Айрим футболчиларни кўрсаётган ўйини кўнгилдагидек бўлмаслиги мумкин. Лекин улар футбол учрашувлари давомида кучайиб боришади, ўйин амалиёти уларни янада кучли қилади.

— Гарчи бугун "Машъал" ғалабага эришган бўлса ҳам ўз уйида иккинчи жамоа сифатида ҳаракатланди. Бунга муносабатингиз қандай?
— Айтиб ўтдим, бугунги ўйинимиздан қониқиш ҳосил қилганим йўқ. Энг муҳими бугунги ўйинда баъзи режаларимиз амалга ошди. Бизга ҳужумда аниқлик етишмаган холатлар учради. Худди шу каби вазиятлар рақибда ҳам кўринди.

— "Машъал"да узоқ масофадан дарвозага зарба йўллайдиган футболчи кўринмаяпти...
— Бугун кўрган бўлсангиз Қўзиев бир неча бор узоқдан рақиб дарвозасига зарба йўллади. Бундай футболчилар бизда бор. Энг муҳими натижага эришдик, ғалаба билан барчани табриклайман.