O‘tgan yil «Andijon»dagi o‘yinlari bilan ko‘pchilikda iliq taassurot qoldirgan Farhod Mirahmatovning joriy mavsum avvalida «Navbahor» safiga qo‘shilishi ko‘pchilik muxlislarni quvontirgandi. Ammo negadir, bu yosh iqtidor egasini so‘nggi turlarda hatto uchrashuv qaydnomalarida ham ko‘rmayapmiz. Buning sababi esa ko‘pchilik qatori bizga ham qiziq. Shuning uchun Namanganda kechgan «Navbahor» - «Turon» uchrashuvi yakuniga yetgach, futbolchi bilan suhbatlashib, savollarimizga javob oldik.

- Suhbatimizni «Turon»ga qarshi o‘yin haqidagi fikrlaringiz bilan boshlasak.

- Bugun o‘yinimiz o‘xshamadi, desam to‘g‘riroq bo‘lsa kerak. «Turon» ham yaxshi o‘yin ko‘rsatdi. Har ikki jamoada ham golga tortadigan qator vaziyatlar bo‘ldi, ammo ulardan foydalanishda xatolar kuzatildi. Bir so‘z bilan aytganda, adolatli durang bo‘ldi, deb o‘ylayman.

- Mazkur uchrashuvda «Navbahor»dan hamma g‘alaba kutgandi. Ayting-chi, jamoaga nima yetishmadi?

- Hujumda sal sustroq harakat qilyapmiz, yanada jo‘shqinroq o‘ynashimiz kerak, deb o‘ylayman. Bellashuvlar qiyin o‘tyapti, jamoalar saviyasi deyarli teng darajada. Shuning uchun har bir o‘yinda g‘alaba qozonishni istaydigan bo‘lsak, yaratilgan vaziyatlardan oqilona foydalanishimiz kerak. Bunday bahslarda minimal imkoniyatlardan ham ustalik bilan foydalanish talab etiladi.

- Sizning «Navbahor»ga o‘tishingizni ko‘pchilik muxlislar xursandchilik bilan qabul qilishgandi. Ammo negadir maydonda ko‘rinish bermayapsiz. Mazkur vaziyatga oydinlik kirita olasizmi?

- O‘zim ham hayronman.Bu savolni murrabiyga bersangiz to‘g‘ri bo‘ladi, deb o‘ylayman. Men ham bu yerga dam olish uchun kelganim yo‘q. Ko‘proq o‘yinlarda maydonga tushib, o‘zimni ko‘rsatib, jamoaga qo‘ldan kelgancha yordam bersam, deyman, lekin meni so‘nggi o‘yinlarda hatto qaydnomaga ham kiritishmayapti.

- Buning sababi nimada bo‘lishi mumkin, hech qiziqib ko‘rdingizmi?

- Bosh murabbiy «Lokomotiv»ga qarshi o‘yindan oldin meni chaqirib, harakatlarimdan e’tirozi yo‘qligini, unga ko‘proq hujumchilar kerakligini aytdi. Bori shu.

- Mavsum avvalidagi suhbatimizda klubga yaxshi niyatlar bilan kelganingizni aytgandingiz. Hozirda «Navbahor»ga kelganingizdan afsusda emasmisiz?

- Yo‘q, hali o‘yinlar ko‘p va o‘zimni ko‘rsatish uchun vaqt bo‘ladi, deb o‘ylayman. Muhimi, imkon berilsa, ishonch bildirilsa, bas.

- Demak, imkon berilishiga ishonyapsiz?

- Albatta, agar imkon berilmasa, klubdan ketishga majburman. Axir ayni o‘ynaydigan va o‘sadigan paytimda faqat mashg‘ulot qilib yuravermayman-ku.

- Murabbiylar almashinuvi ham klub natijalarini o‘zgartira olmayapti. Go‘yoki, jamoada nimadir noto‘g‘ri ishlayotgandek?

- «Navbahor» ketma-ket ikki ko‘ngilsiz natijadan so‘ng biroz umidsizlikka tushib qoldi. O‘ylaymanki, yaxshi o‘yinlar hali oldinda. Shunchaki, jamoaga biroz vaqt kerak.

X.YUSUPOV suhbatlashdi