O‘z vaqtida APL hakamlari orasida afsonaga aylangan Govard Uebbni yaxshi eslasangiz kerak: ligadagi o‘n yildan ortiq davom etgan faoliyat, Chempionlar Ligasi va jahon chempionati finallari, «MYU» bilan do‘stona aloqalari haqidagi millionlab hazillar va avvallari polisiyada ishlagan taqirbosh amaki siymosi. Bibiana Shtaynxaus to‘g‘risida ham yetarlicha ma’lumotga egadirsiz, hoynahoy: Bundesligadagi ilk ayol hakam, erkaklar futbolida ayollarning hakamlik qilishi shov-shuvli tarzda qabul qilingan davrning muhim timsollaridan biri. Mana, shu ikkovlon turmush qurishdi!
Buni Bibiana Shtaynxaus Germaniyaning Bild nashriga bergan intervyusida tasdiqladi: «Xalqaro tanaffus payti turmush qurdik, judayam baxtiyormiz. Afsuski, koronavirus sabab to‘y marosimi mehmonlarsiz, guvohlarsiz o‘tdi, shu bois, Govard bilan ushbu muhim qadamni birga qo‘ydik».
Hakamlar kursidagi tanishuv va ajrim
2014 yil. Rim. FIFA hakamlar malakasini oshirish bo‘yicha kurs tashkil etdi. U yerda Shtaynxaus ilk bor Uebb bilan uchrashdi. «U bilan mehmonxona zalida tanishgandik. «Salom, Bibi. Mening ismim Govard», dedi. Biroz uyaldim, bir amallab uni tanishimni bildirdim. O‘sha holatda o‘zimni yo‘qotib qo‘yganimdan, ortiqcha biror so‘z aytolmagandim».
Keyinchalik Uebb Angliya federasiyasidagi ish bo‘yicha Germaniyaga mehnat ta’tili uyushtirib, bir necha marta Shtaynxusning Gannoverdagi uyiga mehmonga bordi. Shunday uchrashuvlarning birida Govard ancha ushlanib qolgani sababli, sal qolsa, Saudiya Arabistoniga (yana ish bo‘yicha) uchadigan samolyotga kechikayozdi. O‘shanda mazkur voqea haqida gapirib bergandi: «Kechki ovqatdan keyin Bibiga nisbatan tuyg‘ularim ancha jiddiy ekanligini his qildim. Uni yoqtirib qolgandim. Bu oddiy yaxshi ko‘rish emasdi».
Uebb va Shtaynxaus xufyona uchrashib yurishdi. Bibiana atayin Angliyaga bormadi, Govardning rafiqasi Keyga to‘qnash kelishni, mahalliy matbuotchilar nazariga tushib qolishni istamadi. Ammo Germaniya gazetalari ham ushbu juftlikning shaxsiy hayotini zimdan kuzatishga odatlanishdi. 2016 yili Kicker jurnalistlari Uebbni Shtaynxausning Gannoverdagi uyi yaqinida uchratib qolishdi. Oradan taxminan ikki hafta o‘tib, angliyalik hakam rafiqasi bilan ajrashganini ma’lum qildi. Ular 21 yil birga yashashgan, uch nafar farzandlari bor edi.
Bibiana depressiyadan qutqardi
Govard va Key 1988 yili tanishishgandi. O‘shanda 17 yoshda bo‘lgan Uebb bankda ish boshlagandi. Qallig‘i esa qisqa muddatda katta menejer lavozimini egallagandi. Juftlik uch yildan keyin uchrashib yurishdi. Yana to‘rt yildan keyin esa turmush qurishdi.
Uebb bu paytga kelib bankdan ketgan, polisiyada ishlab, bo‘sh vaqtida hakamlik bilan shug‘ullanardi. Vaqt o‘tib, uni oliy liga o‘yinlariga taklif qilishdi - bu omil tez-tez oilasini tashlab, boshqa shaharga ketishni taqozo etardi. Dastavval Key vaziyatni to‘g‘ri tushundi. Ammo Uebb Chempionship va APL darajasigacha ko‘tarilgach, erining faoliyatiga munosabati o‘zgardi.
Govard o‘z kitobida o‘sha davr haqida alohida to‘xtalgandi. Muallif Key haqida gapirarkan, uni sobiq rafiqasi sifatida ko‘rsatgan: «Munosabatlarimizga sovuqlik oralagandi. Ko‘pincha kelisholmasdik. Key har gapimdan ayb qidirardi. Mening yomon otaga aylanib qolganimni aytardi».
Mana, yana shunday qaydlardan biri: «JCH-2010dagi har bir o‘yindan keyin biz (hakamlar bilan) hamkasblarimizdan birining xonasiga kirib, vaqtichog‘lik qilardik. O‘sha onlar yoqimli xotiralar bilan eslayman, ammo JARdan uyga juda yomon kayfiyatda qaytardim».
2015 yilga yaqin Keyning munosabati tamomila ta’na-dashnom va mojarolarga ko‘mildi. Shunday pallada angliyalik hakam Shtaynxaus bilan tanishib qoldi. Ajralish haqida xabar berishi hamono, Bibiana bilan munosabatlari yaqinligini ham tan oldi: «Uni juda yaxshi ko‘raman. Germaniyaga ko‘chib o‘tyapman. Bu ayol so‘nggi yillar mobaynida oilaviy ko‘ngilsizliklar sabab yuzaga kelgan depressiyani yengishda menga yordam berdi. Key bilan o‘tkazgan umrim to‘liqligicha yomon o‘tgan demoqchi emasman. Unga hayotimdagi roli uchun minnatdorlik bildiraman. Ammo endilikda Bibi ikkimizning davrimiz boshlandi. Men baxtliman».
Uebb va Shtaynxaus bir-birlari haqida nimalar deyishgan?
* Shtaynxaus: «Ajoyib inson. Yorqin, pozitiv kayfiyatdagi va juda tartibli».
* Uebb: «Bibini sevaman. U hayotimni muhabbat shu’lalari bilan yoritdi».
* Shtaynxaus: «Qayerda bo‘lmaylik, nima bilan shug‘ullanmaylik, Govard har doim mening eng asosiy tanqidchim va buyuk tarafdorim hisoblanadi».
* Uebb: «Vaqtimni u bilan birga o‘tkazishdan mamnunman, ammo futbol tomosha qilishni yoqtirmayman. O‘yindagi epizodlar bo‘yicha tez-tez qarashlarimiz bir-biriga mos kelmaydi».
* Shtaynxaus: «Bundesligadagi debyutimdan buyon ko‘plab muxlislarga ega bo‘ldim. Ammo Govard - ular orasida eng asosiysidir».
Oila uchun ilk sinov
Bibiana ayni payt Gannoverda yashayapti, ammo ish yuzasidan Kyolndan ijaraga xonadon olgan. Uebb esa Nyu-Yorkda istiqomat qilmoqda, MLS hakamlariga maslahat berib kelyapti.
Juftlik yo‘llarning yana qachon tutashishini bilishmaydi. Shunga qaramay, Shtaynxausning ahdi qat’iy: «Bu qachondir ro‘y beradi. O‘ylashimcha, yaqin orada uchrashamiz. Aslida, ayni paytdagi munosabatlarimiz kuchli sog‘inchni taqozo etadi».
A.ABDUVALIXO‘JAYEV tayyorladi
