«Manchester Yunayted» va Irlandiyaning afsonaviy yarimhimoyachisi Roy Kin Londonning «Arsenal» klubi haqida o‘z fikrlari bilan o‘rtoqlashdi.

«To‘g‘risini aytganda, «kanonirlar»da vaziyat shunchaki dabdala. Odatda, agar biz «Arsenal»ni tanqid qilsak, uning himoyasi haqida gaplashar edik, ammo endi ular hujumda yomon harakat qilishmoqda.

Ular juda kam gol urishmoqda. Albatta, Yevropa Ligasidagi g‘alaba qozonish Mikel Artetaning ustuvor vazifasi. Chunki Chempionlar Ligasiga kirish jamoaga rivojlanish uchun katta turtki beradi.

Ammo, Angliya Premyer-ligasida ularning ahvoli juda yomon. Bu men ko‘rgan eng zaif «Arsenal». Ularda yetakchilar yetishmasligi, mahorat etishmasligi, yorqin o‘yinchilar etishmasligi seziladi. Men bunday jamoadan ko‘p narsa kutmagan bo‘lar edim», - deya Kinning so‘zlarini keltiradi Football London.

Qayd etish mumkin, «Arsenal» 34 turdan so‘ng, 49 ochko jamg‘argan holda APL turnir jadvalida to‘qqizinchi o‘rinni egallab turibdi.

Eslatib o‘tamiz, Yevropa Ligasining birinchi yarim final uchrashuvida «kanonirlar» «Vilyarreal»ga qarshi safar o‘yinida mag‘lub bo‘lishdi(1:2). Javob uchrashuvi esa 6 may kuni Londonda bo‘lib o‘tadi.