O‘zingizga ma’lum, Qarshining "Nasaf" jamoasi 17 may kuni OFK Kubogi “F” guruhi 2-turida Tojikistonning “Xo‘jand” jamoasi bilan kuch sinashadi. Bellashuv mahalliy vaqt bilan soat 21:05 da boshlanadi.
“Xo‘jand” jamoasi haqida gapirishdan oldin jamoamizning tojik klublariga qarshi o‘yinlarini yodga olamiz. “Nasaf” o‘z tarixida faqat bir marotaba tojik klubi bilan kuch sinashgan. 2001/2002 yilgi Osiyo Chempionlar Kubogi musobaqasi ikkinchi bosqichida “ajdarlar” Tojikistonning “Samar-Umid” jamoasi bilan kuch sinashib umumiy hisobda 7:3 hisobida g‘alaba qozongan (4:1, 3:2).
“Xo‘jand” jamoasi haqida…
“Xo‘jand” jamoasi 1953-1991 yillar orasida Sobiq ittifoqning ikkinchi ligasida ishtirok etgan. U paytda jamoaning asosiy vazifasi yana bir tojik klubi “Pomir” jamoasiga futbolchi yetkazib berishdan iborat bo‘lgan. Jamoa 1992 yildan buyon Tojikiston Oliy ligasi ishtirokchisi sanaladi. “Burgutlar” tojik klublari orasida eng sovrindor jamoalardan biri hisoblanadi. Raqibimiz Tojikoston Oliy ligasida yetti marta kumush medali, besh marta bronza medali va to‘rt karra Tojikiston kubogi sohibiga aylangan.
“Xo‘jand” jamoasi OFK kubogi 1-turida Turkmanistonning “Oltin Asr” jamoasi bilan kuch sinashdi va yakunda tomonlar murosaa ko‘chasini tanlashdi – 2:2.
