OFK kubogi 2-turi doirasidagi «Xo‘jand» - «Nasaf» uchrashuvi oldidan tojikistonliklar klubi bosh murabbiyi Rustam Xo‘jayev matbuot anjumanida «Nasaf» klubi haqida iliq fikrlarni bildirdi.

«Bu raqibimiz kuchli chempionatning tajribali jangchisi, desak mubolag‘a bo‘lmaydi. Hech kimga sir emaski, O‘zbekiston – Markaziy Osiyodagi top-chempionat sanaladi. «Nasaf» yaxshi tayyorgarlik va o‘z vazifalariga ega klub. Ammo biz ham o‘z oldimizga maqsad va rejalarni qo‘yganmiz. Ikki jamoa ham o‘z maqsadi yo‘lida ertangi bahsda zafar quchishi lozim. O‘yinga yaxshi tayyorgarlik ko‘rib, ertaga g‘alaba qozonishga intilamiz.

- «Nasaf»ning Qirg‘iziston klubini yirik hisobda mag‘lub etishi sizni cho‘chitmayaptimi? «Xo‘jand» ertangi o‘yin uchun yashirin rejaga egami?
- Bilasizmi, fikrimcha hozirgi futbolda hech qanday sir qolmagan. Hamma jamoa o‘zaro raqibini o‘rganadi, yashiradigan hech narsa yo‘q. Raqibning avvalgi o‘yinda yirik hisobda g‘alaba qozongani bizni cho‘chitmaydi. Raqibni hurmat qilgan holda maydonga tushamiz va o‘z o‘yinimizni ko‘rsatishga intilamiz», - deya Rustam Xo‘jayevning so‘zlarini keltirmoqda Tojikiston klubi rasmiy sayti.