O‘zbekiston terma jamoasining JCH-2022 saralash bosqichidan o‘rin olgan Yamanga qarshi uchrashuvi kutilganidan qiyinroq kechdi.

Uchrashuvning ilk daqiqalarida yamanliklar bizga muammo yaratishga harakat qilishdi. Shu bois, Abramov shogirdlari o‘z o‘yinini topib olguncha biroz vaqt ketdi. Ayniqsa, 14-daqiqada raqiblarimiz hisobni ochib qo‘yishlariga bir baxya qoldi. Qanotdan uzatma berilgan paytda ikki markaziy himoyachimizning o‘zaro tushunmovchiligi evaziga hujumchi darvozabonimiz bilan yakkama-yakka vaziyatda qoldi va zarba berdi. To‘p Sanjarga tegib qaytdi!

Bahsning 19-daqiqasida esa Ibrohimxalil Yo‘ldoshevning sa’y-harakatlari evaziga penalti ishladik. Masharipov esa darvozabonni chiroyli tarzda aldab, 11 metrli jarima zarbasidan hisobni ochdi.

Keyingi daqiqalarda O‘zbekiston o‘z saviyasini namoyish qilib, to‘p nazorati va vaziyatlar yaratish borasida ustunlik qila boshladi. Yaman posboni Muhammad Yaman kamida 3 marta yuz foizli golga tortadigan vaziyatlarni yo‘qqa chiqardi. Xususan, uchrashuvning 82-daqiqasida raqib darvozasi tomon yana bir marta penalti belgiladi. Ahmedovning zarbasini yamanlik darvozabon qaytarishga muvaffaq bo‘ldi.

Hisob qaltis bo‘lgani uchun so‘nggi daqiqalar biz uchun biroz hayajonli o‘tdi. Vaziyatlardan foydalana olmagan bo‘lsak-da, g‘alabani ushlab qolishga muvaffaq bo‘ldik.

Saudiya Arabistoni esa Singapurga qarshi o‘yinda hisobni 84-daqiqa ochdiyu, bahs oxiriga hisobni yirik ko‘rinishga keltirib qo‘ydi — 3:0. Saudiya ushbu g‘alaba tufayli keyingi bosqich yo‘llanmasini hal qilib qo‘ydi. O‘zbekiston 15 iyun kuni ushbu jamoaga qarshi maydonga chiqadi.

JCH-2022 saralash. Osiyo, "D" guruhi, 9-tur
YAMAN - O‘ZBEKISTON - 0:1 (0:1)
Gol: Jaloliddin Masharipov (19-penalti)
Noaniq penalti: Odil Ahmedov (82, darvozabon)
Ogohlantirishlar: Ahmed Sodiq (18), Muhammad Ahmed (64), Muhsin Muhammad (79) — Ikrom Aliboyev (45+2), Eldor Shomurodov (77)
Hakamlar: Muhammad Abdulla, Muhammad Alhammadi, Muhammad Hasan (uchalasi BAA), Ali Hasan Alsamaheji (Bahrayn).
O‘zbekiston – 12.Sanjar Quvvatov, 2.Islomjon Qobilov, 3.Hojiakbar Alijonov, 7.Odiljon Hamrobekov, 8.Ikrom Aliboyev (Abror Ismoilov 62), 9.Odil Ahmedov, 10.Jaloliddin Masharipov, 14.Eldor Shomurodov (Igor Sergeev 90), 15.Umarbek Eshmurodov (Rustam Ashurmatov 46), 19.Sanjar Qodirqulov (Vagiz Galiulin 75), 23.Ibrohimxalil Yo‘ldoshev (Oleg Zoteev 90)
Yaman: 23.Muhammad Aman, 4.Mudir Abdurobu, 5.Alouddin Noman, 6.Jehad Muhammad, 8.Jalol Hezam, 10.Muhsin Muhammad, 13.Ahmed Sodiq, 16.Nosir Ahmed, 17.Mufiyd Jamol (Umar Abdulloh 72), 19.Muhammad Ahmed, 20.Emad Mansur (Ahmed Mohir 70)
11 iyun, 23:00, "Qirol Faxd" stadioni, Ar Riyod, Saudiya Arabistoni.