Xabaringiz bor 13 iyundan 10 iyulga qadar Amerika Kubogi musobaqasi bo‘lib o‘tadi.

Turnirning start olishi turli xil mojarolarni keltirib chiqardi. Aslida musobaqa Kolumbiya va Argentinada bo‘lib o‘tishi kerak edi. Ammo siyosatning aralashuvi sabab Kolumbiyadan mezbonlik huquqi olib qo‘yildi. Kolumbiyaliklarning turnir o‘tkazilishiga qarshi ommaviy protestlari Janubiy Amerika futbol konfederasiyasini shunday qaror chiqarishga majbur qildi. Bu paytda ikkinchi mezbon Argentina davlatida epidemiologik vaziyat keskin darajada og‘irlashdi. Natijada 47-Kopa Amerika Brazilyaga ko‘chirildi. Ammo bu borada ham muammolar yuzaga keldi. Hatto Brazilya terma jamoasi ham musobaqada ishtirok etishdan bosh tortdi. Lekin yakunda vaziyat yaxshi tomonga o‘zgardi. Ko‘pchilik futbolchi va murabbiylar COVID-19 bilan bog‘liq og‘ir vaziyatda turnir o‘tkazilishini istashmasa ham qaror o‘z kuchida qoldi. Shu tariqa Amerika Kubogida 10ta terma jamoa ishtirok etadigan bo‘ldi. Aslida ishtirokchilar soni 12ta edi. Biroq Qatar va Avstraliya JCH-2022 va Osiyo Kubogi saralashida ishtirok etayotgani uchun ular rad javobini berishdi.

Musobaqa muxlislarsiz 5ta stadionda o‘tkaziladi. Mashhur «Marakana» stadioni esa faqat final uchrashuviga mezbonlik qiladi. Amaldagi g‘olib Brazilya unvonini himoya qilishga, Messi esa vaziyat og‘ir bo‘lishiga qaramay terma jamoasi bilan sovrin yutish uchun oxirigacha kurashadi.

Hasan Turdialiyev