Xabaringiz bor, Odil Ahmedov terma jamoadagi faoliyati yakunlanganini ma’lum qildi. Keling, Ahmedovning milliy jamoamizdagi faoliyatini yodga olamiz:

2007 yilda Odil milliy terma jamoa safida debyut qilgan. O‘shandan beri 106 ta o‘yin o‘tkazdi va 21 ta gol urishga muvaffaq bo‘ldi. 4 ta Jahon chempionati saralashida qatnashdi, 3 bor Osiyo kubogida ishtirok etdi va "O‘zbekiston Respublikasida xizmat ko‘rsatgan sportchi" faxriy unvoni bilan taqdirlandi.

Odil Ahmedov nafaqat O‘zbekistonning, balki o‘z vaqtida Osiyoning eng yorqin futbolchilaridan biriga aylandi. Ahmedov deganda ishonch, fidoiylik, jonkuyarlik timsollari ko‘z oldimizga keladi.

Butun o‘zbek futboli jamoatchiligi, Futbol assosiasiyasi va muxlislar nomidan Odil Ahmedovga uzoq yillik faoliyati uchun minnatdorchilik bildiramiz.

Odil Ahmedovning bolalar va o‘smirlar futbolini rivojlantirish borasidagi rejalarida ulkan omadlar tilaymiz. Umid qilamizki, u keyingi faoliyatida ham futbolimiz dovrug‘ini oshirishga o‘z hissasini qo‘shishda davom etadi.