24 va 27 iyun kunlari Toshkentda futzal bo‘yicha O‘zbekiston milliy jamoasi jahon chempionatiga tayyorgarlik doirasida Veneseulaga qarshi ikki o‘rtoqlik o‘yinini o‘tkazadi. 

Bugun, 23 iyun kuni O‘FA majlislar zalida o‘yinoldi matbuot anjumani bo‘lib o‘tdi. Unda O‘zbekiston milliy jamoasi bosh murabbiyi Bahodir Ahmedov quyidagi fikrlarni bildirib o‘tdi. 

«Bizga kuchli raqiblar topishda yordam berayotgani uchun O‘FAga minnatdorchilik bildiraman. Venesuela — jahon chempionatlarida ishtirok etgan kuchli jamoa. Chiroyli o‘yinlar ko‘rsatib, muxlislarni xursand qilishga harakat qilamiz. 

Venesuela uslub jihatidan jahon chempionatida biz bilan bir guruhdan o‘rin olgan Gvatemala va Misrga o‘xshash. Shuning uchun bu jamoa bilan o‘yinlar bizga foydali. Ammo Misr va Gvatemala JCHda umuman boshqa taktikani qo‘llashi ham mumkin.

Chempionatga borishi mumkin bo‘lgan 40 nafar futzalchini belgilab olganmiz. Yig‘inlar va o‘rtoqlik o‘yinlaridagi harakatlariga qarab yakunda 25 o‘yinchini tanlab olamiz», — deya Ahmedovning so‘zlarini keltiradi Tribuna.uz muxbiri.

O‘zbekiston va Venesuela jamoalari o‘rtasidagi o‘rtoqlik bahslari Yunusoboddagi «O‘zbekiston» sport majmuasida bo‘lib o‘tadi. Birinchi o‘yin 24 iyun 19:00da, ikkinchi bellashuv 27 iyun 18:00da boshlanadi.

Eslatib o‘tamiz, O‘zbekiston milliy jamoasi jahon chempionatida Rossiya, Misr va Gvatemala bilan bir guruhdan o‘rin olgan.