"Neftchi" bosh murabbiyi Ilhomjon Mo‘minjonov Pro-liganing navbatdagi turi doirasida "Aral Samali"ga qarshi bo‘lib o‘tgan o‘yin borasida o‘z fikrini bildirib o‘tdi.

"Bugungi g‘alaba bilan futbolchilarni va muxlislarimizni tabriklab qolaman. Raqibimizni o‘rganib chiqib o‘yinga astoydil tayyorgarlik ko‘rgan edik.

Birinchi bo‘limda yigitlarimiz ancha shoshqaloqlik qilishdi. Hujumda ko‘plab xavfli vaziyatlarni yaratishgan bo‘lishsa ham gollar ura olishmadi. Ikkinchi bo‘limda ular ancha o‘zlariga kelishdi va biz bergan ko‘rsatmalarni bajarib, standart vaziyatdan gol kiritishdi. Keyinchalik o‘yinni nazorat ostiga olgan holda pozision hujumlarni yaratib, bundan unumli foydalanishdi va muhim g‘alabaga erishishdi. Agar har bir yaratilgan vaziyatdan foydalanib qolganimizda hisob bundan ham yirik ko‘rinishga ega bo‘lardi. Lekin buni futbol deydilar. 4:0 hisobidagi g‘alabaga ham shukurlar aytaman. Biz ochkolar yig‘ishda davom etib, maqsad sari intilamiz.

Bugungi kunda kichik Darko Stanoyevich, Abdul Aziz Yusupov va Otabek Zokirovlar bilan do‘stona xayrlashdik. Ularga o‘yin amaliyoti kerakligi uchun boshqa jamoaga o‘tishadi. Ularning o‘rnini to‘ldirish maqsadida bir nechta o‘yinchilar bilan muzokaralar olib borilmoqda. Agar bu kelishuvlar amalga oshmasa o‘zimizning futbolchilar bilan kurashni davom ettiramiz. Aytib o‘tilgan uchchala futbolchiga kelgusida yaxshi jamoaga o‘tib, o‘yin amaliyotiga ega bo‘lishlarini xohlar edim.

Ulug‘bek Xoshimov haqida aytadigan bo‘lsak, u hali 20 yoshda va asta-sekinlik bilan o‘z o‘yinini topadi deb o‘ylayman. Mashg‘ulotlarda astoydil shug‘ullanishiga qaramay, tajriba yetishmovchiligi sabab, rasmiy o‘yinlarda ozgina shoshib qolmoqda. O‘ylaymanki, mana shu bellashuvlar orqali gollar urishni boshlaydi va kelgusida yaxshi hujumchiga aylanadi.

Marko Obradovichga kelsak, uning jamoa bilan yil oxirigacha tuzgan shartnomasi mavjud. Agar keyingi yilga yaxshi takliflar kelib tushsa boshqa jamoaga o‘tishi  mumkin.Bu yil Obradovich o‘zining chiroyli o‘yini va gollari bilan barchamizni hursand qiladi degan umiddaman. Biz esa ochkolar yig‘ishda davom etamiz "- dedi Ilhomjon Mo‘minjonov.

"Neftchi"  matbuot xizmati