Bugun, 11 iyul kuni bir oylik voqealarning mantiqiy yakuniga guvoh bo‘lamiz.

Bu safargi Yevropa chempionati avvalgilaridan hali boshlanmasdan keskin farq qilishi aniq bo‘lib ulgurgan edi. Turnirning butun Yevropa bo‘ylab o‘tishi (11 ta shaharda) va uning qoldirilishi (pandemiya bois) buni kafolatlab bo‘lgan edi. So‘ng musobaqa boshlangach biz ketma-ket kutilmagan va qiziqarli o‘yinlarga guvoh bo‘ldik. Eriksenning xushini yo‘qotishi, bir o‘limdan qolib so‘ng o‘nglanishi... eh-he, nimalar bo‘lmadi, deysiz?!

O‘ta go‘zal Italiya, o‘lim guruhidagi gigantlarga muammo bo‘lgan Vengriya, juda nursiz Rossiya va Turkiya, haddan ziyod pragmatik Angliya, omadsiz boshlab, keskin qo‘zg‘algan Ispaniya, oxirgi soniyalarda nimchorakka ilinga Ukraina... guruh bosqichi shu va boshqa o‘nlab alohida jarayonlar bilan yodimizda qoldi.

Keyin esa harorat yanada oshib bordi. Finalgacha o‘tgan 14 pley-off o‘yinidan 7 tasidan qo‘shimcha taymlarga murojaat etildi. 3 bor penaltilar seriyasigacha bordi ish. Ispaniya – Xorvatiya va Fransiya – Shveysariya o‘yini musobaqaning bezagiga aylandi! Supergollar, zargarona uzatmalar, tayanchdagi ajoyib harakatlar, himoyachilarning qahramonliklariyu darvozabonlarning seyvlari... uh-h! Dahshat o‘tdi bari!

Endi final qanday o‘tishini o‘ylasam ham xavotir bosyapti.

Birga ko‘ramiz – UzReport TVda!

Yo Angliya, yo Italiya!

Orif Tolipov tayyorladi.