Bugun Tokioda bo‘ladigan yozgi Olimiada ochilish uchrashuvida bayroqdor sportchilarimiz o‘zgargani haqida xabar qilingandi. Mazkur holat ko‘pchilik uchun tushunarsiz bo‘lgandi. O‘zbekiston Milliy Olimpiya qo‘mitasi ushbu tadbirda delegasiyamiz bayroqdorlarining o‘zgargani yuzasidan rasmiy bayonotni ma’lum qiladi.
Ertadan Tokio-2020 Olimpiya o‘yinlari doirasida hamyurtlarimiz o‘z ishtiroklarini boshlashadi. Avval MOQ tomonidan bo‘lajak Olimpiya o‘yinlarida bayroqdorlarimiz bokschi Bobo-Usmon Baturov hamda sport gimnastikasi vakili Oksana Chusovitina bo‘lishi ma’lum qilingan edi.
Reglamentga ko‘ra, sport gimnastikasi va boks bahslari 24-iyuldan boshlanadi. Oksana
Chusovitina esa 25-iyul kuni saralash bosqichida qatnashadi. Shu boisdan Tokio-2020 shtabi va federasiya rahbarlari bilan maslahatlashgan holda hamyurtlarimiz Oksana Chusovitina hamda Bobo-Usmon Baturovni ortiqcha toliqtirmaslik maqsadida starti keyinroqqa to‘g‘ri keladigan boshqa nomdor vakillarimiz, bokschimiz Bahodir Jalolov va taekvondochi Nigora Tursunqulova delegasiyamiz bayroqdori bo‘ladigan bo‘ldi. Bu bo‘yicha yakuniy qaror 21-iyul kuni qabul qilindi.
Ochilish marosimida ishtirok etish katta vaqt oladi. Unda uzoq muddat tik oyoqda turish va shaharchaga kech qaytilishini inobatga olish zarur. Ma’lumot uchun, Nigora Tursunqulova 26-iyul kuni bahslarga kirishsa, Bahodir Jalolov 29-iyuldan o‘z ishtirokini boshlaydi. Shu bois ularning tiklanib olishi uchun vaqt nisbatan ko‘proq.
Hamyurtlarimizdan vaziyatni to‘g‘ri baholab, bo‘lajak Olimpiya o‘yinlarida terma jamoamiz vakillarini doimo qo‘llab-quvvatlab turishlarini so‘rab qolamiz, deyiladi bayonotda.
