Бугун Токиода бўладиган ёзги Олимиада очилиш учрашувида байроқдор спортчиларимиз ўзгаргани ҳақида хабар қилинганди. Мазкур ҳолат кўпчилик учун тушунарсиз бўлганди. Ўзбекистон Миллий Олимпия қўмитаси ушбу тадбирда делегациямиз байроқдорларининг ўзгаргани юзасидан расмий баёнотни маълум қилади.
Эртадан Токио-2020 Олимпия ўйинлари доирасида ҳамюртларимиз ўз иштирокларини бошлашади. Аввал МОҚ томонидан бўлажак Олимпия ўйинларида байроқдорларимиз боксчи Бобо-Усмон Батуров ҳамда спорт гимнастикаси вакили Оксана Чусовитина бўлиши маълум қилинган эди.
Регламентга кўра, спорт гимнастикаси ва бокс баҳслари 24-июлдан бошланади. Оксана
Чусовитина эса 25-июль куни саралаш босқичида қатнашади. Шу боисдан Токио-2020 штаби ва федерация раҳбарлари билан маслаҳатлашган ҳолда ҳамюртларимиз Оксана Чусовитина ҳамда Бобо-Усмон Батуровни ортиқча толиқтирмаслик мақсадида старти кейинроққа тўғри келадиган бошқа номдор вакилларимиз, боксчимиз Баҳодир Жалолов ва таэквондочи Нигора Турсунқулова делегациямиз байроқдори бўладиган бўлди. Бу бўйича якуний қарор 21-июль куни қабул қилинди.
Очилиш маросимида иштирок этиш катта вақт олади. Унда узоқ муддат тик оёқда туриш ва шаҳарчага кеч қайтилишини инобатга олиш зарур. Маълумот учун, Нигора Турсунқулова 26-июль куни баҳсларга киришса, Баҳодир Жалолов 29-июлдан ўз иштирокини бошлайди. Шу боис уларнинг тикланиб олиши учун вақт нисбатан кўпроқ.
Ҳамюртларимиздан вазиятни тўғри баҳолаб, бўлажак Олимпия ўйинларида терма жамоамиз вакилларини доимо қўллаб-қувватлаб туришларини сўраб қоламиз, дейилади баёнотда.
