Tajribali tennischimiz Denis Istomin ham Tokio-2020 olimpiadasi bilan ilk bosqichdayoq xayrlashdi. Vatandoshimiz hindistonlik Sumit Nagalga qarshi kortga chiqib, 3 set davomida bahs olib bordi.

Birinchi bo‘lim tengma-ket kurashlar ostida kechdi va hisob 4:4 bo‘lib turganida Istomin 2ta breyk-pointga ega bo‘ldi. Ammo Denis undan foydalana olmadi. Aksincha, hind raketkasi keyingi geymda raqibining to‘p kiritishida ochko olib, setni o‘z foydasiga hal qildi — 6-4.

Ikkinchi bo‘limda Nagal faol boshlab, tezda breykni amalga oshirdi. Set davomida Istomin ham raqibining to‘p oshirishida ochko oldi va taybrekkacha olib bordi. "Lotereya"da hamyurtimiz 8-6 hisobida g‘alaba qozondi.

Uchinchi bo‘lim ham tengkurashlar ostida kechdi. Bo‘lim so‘ngida Sumit breykni amalga oshirib, setni va bahsni o‘z foydasiga hal qildi — 6:4.

Tokio-2020. Tennis. Erkaklar, yakkalik, 1/64 final
Sumit Nagal (Hindiston) - Denis Istomin (O‘zbekiston) - 2:1 (6-4, 6-7 (6), 6-4)