Тажрибали теннисчимиз Денис Истомин ҳам Токио-2020 олимпиадаси билан илк босқичдаёқ хайрлашди. Ватандошимиз ҳиндистонлик Сумит Нагалга қарши кортга чиқиб, 3 сет давомида баҳс олиб борди.

Биринчи бўлим тенгма-кет курашлар остида кечди ва ҳисоб 4:4 бўлиб турганида Истомин 2та брейк-поинтга эга бўлди. Аммо Денис ундан фойдалана олмади. Аксинча, ҳинд ракеткаси кейинги геймда рақибининг тўп киритишида очко олиб, сетни ўз фойдасига ҳал қилди — 6-4.

Иккинчи бўлимда Нагал фаол бошлаб, тезда брейкни амалга оширди. Сет давомида Истомин ҳам рақибининг тўп оширишида очко олди ва тайбреккача олиб борди. "Лотерея"да ҳамюртимиз 8-6 ҳисобида ғалаба қозонди.

Учинчи бўлим ҳам тенгкурашлар остида кечди. Бўлим сўнгида Сумит брейкни амалга ошириб, сетни ва баҳсни ўз фойдасига ҳал қилди — 6:4.

Токио-2020. Теннис. Эркаклар, яккалик, 1/64 финал
Сумит Нагал (Ҳиндистон) - Денис Истомин (Ўзбекистон) - 2:1 (6-4, 6-7 (6), 6-4)